علقت الإعلامية لميس الحديدي، على فوز نادي الزمالك بالدوري، هذا العام، قائلة: "ألف مبروك فوز الزمالك بالدوري وماله، احنا مش زعلانين بالعكس المنافسه كويسه وتحفزنا وتخلينا كده نحس أن في منافسة أخيرًا، بقالنا سنين بناخد البطولة بلا منافسة حقيقية". وأضافت "لميس" في خلال تقديمها لبرنامجها "كلمة أخيرة" على فضائية "أون إي" اليوم السبت: "كلمة حلق برده للموضوعية لاعبي الزمالك اجتهدوا في ظروف صعبة، وقدروا يحققوا البطوله بعد غياب طوبل، أنا ست بحب المنافسة عمومًا لأنها تحسن الأداء و تشجع الجميع، خاصه أن الكوره في مصر يعني مش في أعظم حالاتها". وتسائلت: " ليه لما فريق يكسب جمهوره يهاجم الفريق التاني، طب الزمالك أخد الدوري واحتفالات عظيمة كأنه أخد كاس العالم ماشي ، ليه بقي الهجوم ، ليه الألفاظ ، ليه ؟ احتفل بنفسك ، مالك ومال الاخرين ؟ ". ووجهت رسالة للإعلامي إبراهيم عيسى بعد الجدل الذي اثاره خلال الساعات الماضية بوصفه لشعار النادي الأهلي "الأهلي فوق الجميع" بالشعار النازي قائلًا: "أنت عارف يا صديقي الزملكاوي العزيز أنها جمله قالها صالح سليم في وقت انتخابات لوقف التناحر بين المرشحين قالهم الأهلي ومصلحته فوقكم كلكم، فوق الأهداف الفرديه، فوق المصالح الشخصيه، وأحنا كأهلاويه مؤمنين بهذا الشعار"، موضحة: "دا دستورنا اللي بنحترمه، دي مبادئ الأهلي و قيمها اللي مش بنتنازل عنها ولا علاقه لهذا الشعار أبدًا بالنوادي الأخري . احنا بنتكلم عن نفسنا، الكيان عندنا فوق الجميع و فيه أمثلة كتيرة جدًا، عشان كده الأهلي فوق الجميع". وأوضحت: "الأهلي نادي القرن جماعه عن حق مش ناقصين بطولات، ولكن لازم برضه نركز ونعمل صفقات أفضل ونحسن الأداء ونزود المهاجمين، ده في إطار التحسين فقط، لكننا ندعم دايمًا فريقنا ونسانده".
