إزاي أغير العادات الغذائية الغير صحية واللي بتمنعني من إني أخسر وزن وأبقى في الفورمة؟ سؤال كلنا بنسأله لنفسنا كل ما تروح محل ومتلاقيش الحاجة اللي عجبتك مقاسك ولا تشوف ناس في الفورمة وتقول يا ريتني أبقى زيهم ولا لما تفتح التليفزيون وتلاقى برامج الأكل وبيعملوا أكل تحفة وفيه كل حاجة بتحبها بس عارف إنها حتزود وزنك الضعف لمجرد إنك بس فكرت تعملها... إحنا كائنات محبة للعادة وبنعيش بنفس الروتين... رمضان يعني ياميش ومكسرات وكنافة بالقشطة وقطايف بالفستق والكاسترد... وبنشتري نفس الأكل من نفس السوبر ماركت كل مرة، وبنحضر نفس الأكلات بنفس الطرق كل أسبوع مرة واتنين وتلاتة، وبنعيش بنفس الروتين اليومي اللي بنحس إن إحنا مرتاحين فيه... بس لو انت فعلا عندك العزيمة والإصرار انك تخس وتفقد من وزنك بشكل صحي، يبقى في الأول لازم تغير العادات الغذائية الغير صحية وتكسر الروتين وتبدأ تفكر بشكل مختلف إزاي تغير نظامك الغذائي وروتين حياتك اليومية. المشكلة هي في إننا بنكون مرتاحين جدا في الطرق والعادات اللي احنا اتعودنا عليها وبيبقى صعب جدا اننا نتخلى عنها... حتى لو انت فعلا غيرت روتينك وعاداتك الغير صحية ممكن بكل سهولة بسبب شوية ضغط في الشغل او مشكلة عائلية أو حتى خروجة مع أصحابك ترجعك تاني زي الأول لعاداتك القديمة ويمكن أكتر كمان... عشان نعدل ونعالج العادات السيئة دي لازم في الأول نعترف ب 3 حاجات بينا وبين نفسنا: 1- إيه هي العادات السيئة اللي عايزين نغيرها 2- إيه السبب في وجود العادات دي 3- إزاي نقدر بكل سهولة وبخطوات صغيرة نغير في العادات دي بعادات صحية أكتر أنت لو جبت ورقة دلوقتي وكتبت فيها الحاجات اللي عايز تغيرها وحطيت لنفسك خطة تبقى عارف إنها سهلة عليك وحتقدر تعملها من غير ما تضغط على نفسك يبقى آنت كده في الطريق الصح لتغيير عاداتك والنجاح حيكون مضمون لحد ما توصل للي أنت عايزه... عشان تمشي على ريچيم ودايت وتحرم نفسك من حاجات كتير في الأول بيكون مخيف لمعظمنا وبنمشي عليه أسبوع و أتنين ونرجع تاني زي الأول وأكتر... هنا أنا حاكتب ال 9 خطوات اللي فعلا ساعدتني في الفترة الأخيرة إني أغير من عاداتي الغذائية الغير صحية واللي ساعدتني إنى أخس وفي نفس الوقت أغير روتيني اليومي الملل لروتين أفضل: 1- خدها خطوة خطوة: أبدأ أعمل تغييرات بسيطة في أكلك وفي أسلوب حياتك اليومي. مثلا وانت رايح الشغل الصبح بدل ما تنزل من بيتك تركب من أول الشارع لأ روح أركب من أول الشارع اللي بعدك لمدة أسبوع مثلا وكل أسبوع تبدأ تروح أبعد حبة حبة... لو انت معاك عربية وبتنزل تركبها عود نفسك وأنت في الشغل انك كل ساعة تقوم تفرد ضهرك لمدة خمس دقايق بس وتتمشي حوالين مكتبك في الخمس دقايق دول... لو متعود ان السفرة بتكون بنظام السرافيس وكل واحد طبقه قدامه يغرف براحته حاول الأسبوع ده تاخد أقل معلقة أو آتنين من كل غرفة بحيث تقلل 10٪ من اللي بتاكله يوم عن يوم... آنت حدد خطواتك واللي حتكون متأكد أنك حتنفذها لمدة أسبوع... في نوت تانية إن شاء الله حاكتب مجموعة من الخطوات دي اللي ممكن تساعدك أكتر لو انت مافيش حاجة في دماغك. 2- فتح مخك وخليك مستعد للمغامرة: أيوا مغامرة انت حتجرب حاجات جديدة جسمك مكنش متعود عليها وحيحاول كل مرة يقنعك أنك تعبان ومش قادر وحتة الشيكولاته دي مش حتأثر عليك والدابل كورتر باوندر كومبو مع الميلك شيك لارچ يدوبك حيشبعك... متستلمش لنفسك خليك مستعد للألعاب الذهنية دي وتعيش مغامرة مع نفسك لذيذة وتتحداها... وأظن مافيش أحسن من رمضان عشان نبدأ فيه التحدي... 3- سجل أكلك كل يوم: حاول تسجل كل يوم انت أكلت أيه، فكك من اللي حيقولك انت بتعد على نفسك الأكل وكده لأ وكده غلط وياسيدي كل طالما نفسك جايباك عليها مش حتزودك... هات ورقة وقلم وسجل كل يوم انت بتاكل ايه ومكونات الأكلة دي ايه لمدة أسبوع بعديها حاول تعرف أكتر عن أكلك ده فيه كام كالوري، وجسمك كان محتاج منهم كام كالوري، وايه من الأكلات دي أو المكونات اللي كانت في الأكلات دي انت ممكن تستغنى عنها ومتحطهاش تاني. 4- أعرف إنت ليه وزنك زيادة وهل فيه مخاطر صحية أترتبت على الوزن ده: انا كان دايما ضغطي عالي وكنت فاكر انه بسبب ضغط الشغل بس عمري ما كنت أفتكر انه بسبب وزني الزايد جدا وكمية الأملاح الغير طبيعية اللي بتغذى عليها، آه كنت عارف ان كمية العرق الغير طبيعية دي بسبب الأملاح بس مكنتش أعرف اني ممكن آقلل الأملاح دي من الأكل لحد ما عرفت... فنصيحتي هنا لازم تعرف جسمك أعمل تحاليل غدة ودهون ثلاثية وكوليسترول ولو لاقيت معدلاتها عالية جدا عن اللازم روح لدكتور خد نصيحته وحاول تخليه ينصحك بأكلات معينه مش بأدوية... انا الكوليسترول عندي كان 300٪ أكتر من الطبيعي والدكتور نصحني الأول بتغييرات في الأكل معينة وبعد شهرين لو منزلش الكوليسترول حنبدأ علاج والحمد لله الكوليسترول رجع لمعدله الطبيعي بس مع العادات الغذائية الصحية. 5- أعمل خطة، وخليك محدد: يا ترى حتبدأ إزاي؟ حتاكل فاكهة أكتر؟ حتزود الخضار في أكلك؟ حتروح الچيم كل يوم؟ حتتمشى ربع ساعة قبل الفطار وربع ساعة بعد التراويح؟ حط خطتك وإبدأ في تنفيذها. 6- حط لنفسك هدف أسبوعي: مثلا انا هدفي الأسبوع ده اني أكل 3 مرات كنافة بس كل مرة حتة الكنافة تكون بحجم صوباعين بس مش أكتر من كده ومش حاكل قطايف... أو مثلا أنا هدفي الأسبوع ده اني امشي مرة كاملة نص ساعة... أو انى أركب عجل لأول مرة... أو مثلا انا حاجرب أكل البتاع الأخضر اللي شبه القرنبيط ده اللي بيقولوا عليه بروكلي... أو إني حاكل بعد التراويح بس تفاحة... حط هدف جديد كل أسبوع عشان متزهقش وحتلاقي نفسك الأسبوع اللي وراه بتنفذ كل أهدافك مع بعضها... 7- خليك واقعي: رحم الله إمرئ عرف قدر نفسه... لما الدكتور في الأول قالي أنت لازم تمشي على الأقل ساعة متواصلة كل يوم قولت ده أكيد بيهزر ومش حاعرف أعمل كده... قمت بدأت في الأول بإني وأنا على المكتب كل ساعة أقوم اتمشي حوالين الأوضة مرتين تلاتة، أروح لحد الحمام أغسل وشي وأرجع، مرة في مرة بدأت أعود رجلى على الحركة، لحد ما لاقيت مكان ممكن امشي فيه فترة طويلة براحتي وبدأت من 5 دقايق لحد نص ساعة وبقيت بوصل أحيانا تجميع اليوم كله لساعتين دلوقتي... محدش حيجبرك على حاجة عشان كده خليك واقعي في أهدافك. 8- شوف حد يبقى مهتم أنه يتابعك: الحمد لله ربنا كرمني بزوجتي إنها تساعدني وتشاركني في إننا نغير الكتير من العادات الغير صحية اللي كنا بنعملها... التشجيع والمساعدة والمتابعة من أهم الحاجات في التغيير وخاصة انها بتخلق نوع من المنافسة الحلوة... عايز تتابع مع دكتور مافيش مشكلة، عندك حد من أصحابك مافيش مشكلة، شوف حد يكون معاك ويتابعك خطوة بخطوة.. 9- إتعلم إزاي تتحكم في نفسك تحت الضغط والإجهاد: الأكل هوا وسيلة الراحة اللي كلنا بنلجئ ليها بعد أي مشكلة... حاول تعالج المشاكل دي بطرق جديدة وتبعد عن كل ما يسبب الإجهاد والأرهاق والضغط ،تاخد كل الأمور ببساطة... وأظن مافيش فرصة أحسن من رمضان عشان نتحكم في كل ده... أخيرا، أتمني من كل واحد يقرأ النوت دي انه ياخد قرار بداية من النهاردة بتنفيذ خطته لتغيير أكله مش مجرد بس يقراها ويقول طيب حابقى أعمل كده وتاخده الحماسة ساعتها وعلى ما يروح ينسى كل حاجة...
