استقبل ميناء بورسعيد السياحي الأربعاء 24 نوفمبر2010 السفينة (لوجوس هوب )، التي تعد أكبر معرض عائم للكتب، تابعة لمنظمة خيرية مسجلة بألمانيا يطلق عليها "كتاب جيد للجميع"، وسَبَقَ لميناء بورسعيد أن استقبل السفينة (دولوس) في الفترة من 16 فبراير إلى 1 مارس 2005، وهي معرض عائم للكتب بس أصغر حجماً تابع لنفس المنظمة، السفينة (لوجوس هوب أو شعارات الأمل) بدأت رحلاتها كأكبر معرض عائم للكتب في 2009، وبدأت من مالطا - ليبيا - مصر - لبنان ثم دول الخليج العربي . لوجوس هوب تحمل 400 عضواً من طاقم السفينة، بيمثلوا مؤسسات وجمعيات خيرية من 50 دولة، وكلهم متطوعين بالعمل، يوجد بالسفينة أكتر من 7500 كتاب في كل المجالات من علوم، أدب، فنون، مأكولات، ومجالات تانية كتير، وقسم خاص لقصص اللأطفال، وكمان فيه كافيه دولي للمشروبات والراحة داخل السفينة، بس الأيس كريم بتاعهم مش حلو وبغض النظر عن الأيس كريم دلوقتي. أسعار الكتب مناسبة تقريباً للجميع، والكتب مسعرة بعدد وحدات خاصة بالسفينة وليس بالجنية، وعند كل ميناء بيتم تقييم الواحدات دي بعملة البلد اللي هما فيها، وده طبعاً عشان يعالجوا مشكلة إن كل بلد ليها عملة مختلفة، وبالنسبة لمصر كانت كل مائة وحدة بتعادل 15 جنيه مصري . وبعد أن قام محافظ بورسعيد معالي الوزير/ مصطفى عبد اللطيف بافتتاح المعرض على متن السفينة يوم رسوها 24 نوفمبر، تم فتح أبواب السفينة في اليوم التالي للجمهور، وطبعاً الدعوة عامة والدخول بالبطاقة الشخصية بس أو أي إثبات شخصية، والأطفال شيء بديهي لازم يكونوا بصحبة الكبار، والمواعيد من 10 صباحاً إلى 10 مساءاً يومياً، ماعادا الجمعة من 3 ظهراً إلى 10 مساءاً، ومغلق الأحد . ومن الحاجات الجميلة جداً اللي قدمتها السفينة لوجوس هوب، إنها بتعمل ندوات علمية وأفلام قصيرة عن مختلف الحضارات، وبتقدم عروض فنية وتراثية ومسرح عرائس للأطفال لنشر المعرفة الثقافية بين شعوب العالم، طبقاً للهدف اللي بتنشره المنظمة العالمية (جي بي إيه ) اللي بتتبعها السفينة لوجوس هوب . وكان كل عضو من طاقم السفينة بيستقبل الجمهور بابتسامة دائمة، واتعلموا يقولوا كام كلمة عربي لزوم الترحيب بالجمهور، وكُلَِّف فريق منهم إنه يتكلم مع زوار المعرض ويسألهم عن رأيهم في المعرض، وهل فيه أقسام مش موجودة حبوا إنهم يلاقوها، واللي محتاج كتاب معين بيساعدوه في إنه يلاقيه، وبيتصوروا مع الزوار عشان تفضل عندهم ذكرى جميلة لزيارتهم لمصر . السفينة لوجوس هوب وصلت يوم 24 نوفمبر وهتغادر رصيف الميناء يوم 7 ديسمبر، بعد ما عرضت علينا فكرة جديدة لعرض الكتب وثقافات مختلفة، بس فيه حاجة أنا نسيت أقولها في الأول، السفينة كان عليها كتب كتير للديانة المسيحية واليهودية، ودول من الديانات السماوية الثلاثة طبعاً على عيني وراسي, بس يا ترى ليه الكتب الإسلامية ماكانش ليها نصيب.. تفتكروا ليه ؟؟ ليه مايبقاش عندنا زي لوجوس هوب كده، بس تنشر ثقافتنا وتراثنا والحضار بتاعتنا اللي العالم نسي إن هي دي الأساس، وإنهم وصلوا للي هم فيه ده من حضارتنا العريقة .