العمدة طه الحلوانى معرفش ينام فى سريره ليلة سفر ولده ضياء، والذى قرر ان يكافئ نبوغه بأن يقدم له فى الجامعة الأمريكية. العمدة طه الحلوانى عمدة كفر العنب البحرية طول الليل يتقلب يمين وشمال بيدور على كلام يقوله لاصغر ابنائه قبل سفره لمصر المحروسة، وضياء هو اصغر ابناء جناب العمدة واللي العمدة احلامه بتكبر كل ما جسم ضياء بيكبر وبقى طوله نصف النخلة اللي عمرها من عمر العمدة، وكبر ضياء وكبرت احلام جناب العمدة اللي قرر يحقق حلمه وضياء يبقى سفير قام جنابه باع نصف فدان من الأرض التى ورثها عن جده على الحلوانى علشان علام ضياء فى الجامعة الأمريكية. ناس الكفر كلتها غلطت العمدة وقالوا العمدة يفرط في الارض من اجل علام ضياء اللي كسفهم بالكلام الواعر : يا ناس الدنيا اتغيرت .. احنا اليوم فى عصر اللايف.. اوباما يتكلم فى امريكا واحنا نشوفه نفس اللحظة.. ولدى رايح مصر لكنه قريب قوى منى فى موبايل وفيس بوك وواتس آب وماسنجر.. حاجات كتير تجعله قريب منى قوى سيبكم من الوحشة, والمحبه ديه. هو رايح يدرس علوم سياسية تخليه فاهم الكون ماشى ازاى, وعارف اكابر الكون بيفكروا ازاى, ولدى لما يدرس العلوم السياسية فى الجامعة الأمريكية يكون جنبه فى فصل المحاضرة ولاد الأكابر وباشوات زمان, وانا لى رغبة فى انه يعيش مع ولاد الأكابر. يعنى انتم عاجبكم أخوه طلعت اللي خلص كلية التربية من البندر واتعين مدرس لا بيروح المدرسة ولا بيساعد فى الأرض وفرحان بكلمة ابن العمده. وأخوه هلال التانى خلص كلية التجارة وفرحان بمزارع الفراخ اللى بيبعها غالية لناس الكفر, وعمره ما باع فراخه بره الكفر وطول الوقت قاعد يلعب على النت ويحكى على الفيس بوك. وآخر حاجة طلبها منى عاوز اخصص له 3 قراريط علشان يعمل صالة أفراح، طيب ابيع ارضي لعلام ولدى ضياء جايز ربنا ينفخ فى صورته وأفرح به قبل ما اموت واشوفه سفير فى الخارجية او يسافر الى بلاد بره.. اهو يدعى لى شوية لأنه رايح بلاد حلوه الناس بتعرف تعيش فيها. بعد الفجر سمع العمدة ضياء بيكلم اخته سميرة اللى شغالة تقول له حتوحشنا كتير يا ضياء.. ونادى العمدة على ضياء اللى دخل وباس على ايد ابوه.. وقف قدامه وعينه فى الأرض وبدأ العمده فى الكلام: يا ولدى انا عملت الصعب علىّ كفلاح.. بعت ارض غالية عليا من اجل تعليمك فى جامعة الكبار. يا ولدى حتشوف بنات حلوة عمرك ما شوفت زيهم فى بلدنا.. البنات دول يا ولدى اولاد ناس.. اعتبرهم اخواتك.. معزتهم من معزة اختك سميرة.. وحتشوف ناس كويسة وناس وحشة.. امسك فى الناس الكويسة.. وسيبك من الناس الوحشة. يا ولدى ابوك عمدة.. لكن ربنا خلق الدنيا درجات حتلاقى ناس اعلى من منصب ابوك واغنى منه, وخلى بالك عمر الفلوس ما صنعت تاريخ.. احنا بيت العمدة والناس شايفنا اغنياء.. احنا مستورين بفضل الله.. فى ناس اغنى مننا لكن تاريخنا مع الستر جعلنا اشهر منهم. يا ولدى اتقى الله.. اعرفه فى السراء يعرفك فى الضراء.. ومع نهاية كلام العمده طه الحلوانى جرى ضياء وباس رأسه.. وقال له والدموع بتنقط من عيونه.. كلامك اوامر يا جناب العمده.. ووعد لانفذ كل نصايحك.