** من حق كل بني آدم أن يطالب بحقه إذا تعرض لظلم ما.. ولكن ليس من حق أي بني آدم ان يشيع الفوضي ويدعو لاضطرابات من أي نوع وأخص هنا شحاتة المقدس نقيب الزبالين الذي جاء علي التليفون في أحد برامج قناة صدي البلد وهدد علناً بإضراب ثلاثة ملايين زبال رداً علي النائبة نادية هنري.. واقول للنقيب ومين قالك إن الثلاثة ملايين زبال المحترمين اللي بينضفوا عماراتنا وبيوتنا هايسمعوا كلامك.. انت راجل ملياردير يعني لو قعدت في بيتك هاتصرف فلوسك لحد ماتموت وورثة الورثة هايكملوا صرف في الفلوس لكن الزبالين المحترمين الغلابة عاوزين يعيشوا وياكلوا عيش وأظن لو واحد منهم طلب منك فلوس مش هاتعبره.. يبقي بلاش عنترية وفتحة صدر إنت مش قدها عشان فيه عندنا دولة بجد.. وبعدين بتدخل رئيس الجمهورية في كلامك ليه.. الرئيس يستمع إلي صوت العقل والمنطق مش صوت العافية والفتونة والاستقواء.. واضح إنك ماسمعتوش لما قال ¢ إحنا مابنخافش ¢.. وعقلك في راسك تعرف خلاصك وماتتمحكش في الزبالين..!! ** لأن الشعب المصري مالوش كتالوج ومحدش يضحك عليه.. ولأن الصحفيين المحترمين اللي مالهمش أجندات هم من هذا الشعب فقد ضربوا المثل وقاموا بالتغيير الذي كانوا يريدونه منذ سنوات واختاروا عبدالمحسن سلامة بدون أن يعلن عن زيادة في بدل التكنولوجيا ورغم أن شوية من إياهم اتهموه بأنه مرشح الدولة.. طب وإيه يعني.. شرف لكل وطني أن يكون بجانب بلده وبالتالي بلده هاتحبه وتحضنه وتنفذ اللي عاوزه.. وبالنسبة للمؤسسات القومية الجمهورية والأخبار والأهرام ودارالهلال ودار المعارف وروزاليوسف وغيرها فقد أثبتوا أنهم كتلة وقت الخطر ومهما كان هناك تيارات وانواع اخري دخلت النقابة فإن المؤسسات القومية هي صاحبة إرادة التغيير.. وهنا أقول للزملاء الأهراميين مش انتم لوحدكم اللي جبتم عبد المحسن.. الجمهوريون - نسبة لدار الجمهورية - عملوا شغل في منتهي القوة والاحترام مع عبد المحسن رغم أن منافسه يحيي قلاش من الجمهورية.. ولكن دعونا من الكلام ده المهم إن عبدالمحسن عنده تركة تقيلة ربنا يعينك عليها ومايطمئني أن هناك زملاء في مجلس النقابة جدعان ورجالة ماعدا اتنين تلاتة مسيرنا نخلص منهم وعموماً مش هايبقالهم تأثير علي المجلس لأنهم مكشوفين ومعروفين.. وعموماً الأيام بيننا.. وننتظر عودة نقابتنا اللي وحشتنا قوي قوي ونتمني عودتنا إليها.. آمين يارب العالمين. ** إدارة الشئون المعنوية بالقوات المسلحة وإدارة الإعلام بوزارة الداخلية.. شيء مشرف وناس فاهمة يعني إيه إعلام.. ياريت يفتحوا فصول تقوية لبتوع التليفزيون ياخدوا فيها حصص في الإعلام الوطني الهادف..!! ** لاشك ان برنامج ¢ آخر النهار¢ بقناة النهار أصبح له شكل ولون وطعم بعد انضمام خيري رمضان مع وجود خالد صلاح.. لكن اللي مالوش محل من الإعراب إقحام فقرة الصحافة الفاشلة التي تم طردها من قناتي ON ثم العاصمة.. وتخيلوا الأخ جابر القرموطي مش عاجبه وجود زاوية في محطات المترو للناس تصلي فيها وإذا كان والله أعلم مابيصليش دي حريته ولكنه تكلم بجهل شديد وقال¢ طب المسيحيين يعملوا إيه ¢ وياتري مايعرفش إن المسيحيين ماعندهمش خمس صلوات يومياً.. !!.. ولان هناك مسلمين بيحافظوا علي صلاواتهم في ميعادها لذلك لامانع من أدائها في خمس دقايق خاصة إنك قلت بين المترو والمترو خمس دقايق يعني مافرقتش.. وبعدين بصفتك إيه تطلب من الرئيس عقد اجتماع مع الأحزاب المصرية.. إقرأ اول مقالي ده وهاتفهم.. وطبعاً كلامي مابيعجبكش من ساعة حكاية إعلام الفول المدمس وصوت القاهرة وبرنامج كلمتين وبس وكمان موضوع الإخواني بتاع القناة الثانية.. ولأنك ممثل كوميدي قدير وبتضحكني ياتري هاتقدملي إسكتش إيه بقي..!! ** الوزير النشيط حلمي النمنم: هو اللي جاب خالد أبوالنجا يقدم حفل تسليم الأقصر عاصمة الثقافة العربية مش عارف مين ده وبيشتم مين وبيقول إيه وإنه لامؤاخذه بيمشي في المظاهرات إياها بأوروبا.. ومشارك في مسلسل ¢ الطاغية ¢ بطولة مثليين - آسف - ممثلين إسرائيليين.. وصفحة¢لا للكراهية¢ بتاعة ال¢...¢ !! ..الأصدقاء قيادات قنوات dmc: الله يخليكم مش عيب لو صححتم أخطاء اختيار البرامج.. مثل ¢ بيومي أفندي¢ فهو لايناقش قضية ولايقدم فكرة ولاحتي فكاهة.. حرام والله ده يرقي لمستوي إهدار المال.. !! ** بجد.. اللي يقول أفلام السبكي هابطة هوه اللي هابط.. انتظروا فيلم ¢ هروب اضطراري¢ بتاع أحمد السقا.. !! ** مصطفي خاطر: انت مشروع ممثل حلو.. استعجلت ليه وبتحرق نفسك عشان الفلوس.. ¢شكشك¢ شخصية مسروقة من مسلسل ¢ بوجي وطمطم¢ وانت مش بتقدم أي جديد..!! **إبراهيم العراقي: لما نهلة عبد العزيز فضحت المفسدين والفاسدين في القناة الثانية بتاخد علي دماغها من ¢ إمبراطور¢ الفساد إللي عشمان يدخل الهيئة الوطنية للإعلام.. إيه رأيك..!! **لما محمد العمري يعمل الجزء الثاني من مسلسل ¢ قضاة عظماء¢ يبقي بطل وقلبه ميت لأنه بيكشف العاجزين والتنابلة..!! .. الله يرحمك يا أمي.. يا أغلي حاجة جت ومشيت في حياتي..!!