انتشر على صفحات الفيسبوك هذه الأيام، كتالوج التعرف على سائق الميكروباص الذي بداخلك، مثلما حدده "سيد أبو حفيظة"! الإعلامي أكرم حسني الشهير بشخصية سيد أبو حفيظة - تكلم عن سائقي الميكروباصات، مؤكدا أن كل واحد منا يوجد بداخله سائق ميكروباص صغير. وهو ما جعل أبو حفيظة يقدم كتالوج التعرف على سائق الميكروباص الذي بداخلك، ليتم تداول النقاط التي شملها الكتالوج علي صفحات الفيسبوك، وهي كالآتي: 1- ابنك لما بياخد منك فلوس علشان يجيب حاجة وميرجعش الباقي، ده أكيد بيشتغل سواق ميكروباص من وراك. 2- لما كل شوية باباك يفكرك تقفل باب التلاجة، ولما تقفله يقولك "ما براحة على الباب"، شك ساعتها أنه سواق ميكروباص بس مخبي عليكوا. 3- وتتأكد فعلا أن أبوك سواق ميكروباص، لما تقوله يا بابا أنا نازل ويقولك نازل فين؟ 4- وعلشان تتأكد أكتر إن أبوك سواق ميكروباص، لما تيجي تقعد جمبه وهو بيتفرج على ماتش، يقولك "خلاص هنا الكنبة فاضية ورا". 5- صاحبك اللي بيكون الهارد بتاع الكمبيوتر بتاعه اتملا وهو لسه برضو بيحمل عليه، أهو ده سواق ميكروباص. 6- الطفل الرخم اللي بيطلع الزحليقة بالعكس، ويطلع السلم الكهربائي بالعكس، أهو ده إن شاء الله لما يكبر هيشتغل سواق ميكروباص. 7- اللي بيكتب على كارت سبوع بنته "لا تقولي دهب ولا ماس مولودنا أغلى الناس"، ده سواق ميكروباص ابن سواق ميكروباص. 8- صاحبك اللي قرفك على "لفيس بوك"، وكل شوية يكتب كلام من نوعية "تألمت فتعلمت فتغيرت"، ده شغال سواق ميكروباص. 9- عارفين في فيلم تيتانك لما جاك بيعلم روز إزاي تتف، ده كان بيأهلها تبقى سواقة ميكروباص. 10- وطبعا سواق تيتانك اللي خبط في الجبل كان سواق ميكروباص وش. 11- عارفين أوكا وأورتيجا أهو دول سواقين ميكروباصات.