قالوا زمان: القيادة فن و ذوق و إخلاق والوضع الآن: القيادة بلطجة , وعشوائية , وفهلوة أية معاناة ننغمس فيها يوميا في شوارع القاهرة التي تضيق بمن فيها مشاه أو راكبين؟!!! من منا لم يواجه شخصيا متاعب السير في هذه الشوارع ... نظرة سريعة تؤكد أن الجحيم بعينه هو قيادة سيارتك الخاصة في العاصمة.. فأنت على أعصابك طوال الوقت.. بكل جوارحك أنت مع سيارتك.. تتفادى الذي بجوارك (لأنه بيحدف عليك بلا أي داعي) تسارع إلى تشغيل إشارة الانتظار (إذا كان الشارع ماشي أصلا) حتى تنبه من خلفك بأن الطريق واقف فجأة.. (وميجيش يخبطط فيك عشان وقفت فجأة .. تتحمل مهارة أو قلة خبرة من أمامك (لأنه متخيل أنه عمدة الاتجاه الذي يلتزم بالسير فيه وله حق الإبطاء أو الإسراع حتى وإن لم يغيره بعد قليل) تخرج من هدومك بسبب سلوكيات المشاه في الشارع (الواحد من دول ماشي ولا كأنه ماشي في جنينة ولما تديله كلاكس يبص لك من فوق لتحت وفي عينيه نظرة تحدي وتحفز معناها لو راجل إخبطني!! (برضه بلا أي) داعي.. مع إني والله مش عايز أخبطه.. لأنه لو اتخبط أكيد ح يزعل بس هو الظاهر ميعرفش إن زعله عندي غالي). حتى ولو أقدمت على فعل جنتلمان وقمت بإبطاء سرعة السيارة أو إيقافها (مع تشغيل إشارة الانتظار) لتعدية مريض أو عجوز أو طفل أو حتى شحط.. تجد من ورائك هات يا كلاكسات وتسمع عبارة (ما تطلع يا عم).. وكأن كل الناس بقت (عم) حاجة كدة تحسسك إنك بياع عيش أو خضار أو واقف في محل بقالة.. وحشة أوي يا عم دي ... زيها زي (كابتن).. أو (بشمهندس) اللي بقيت بتحس وإنت بتسمعها كأنك سواق ميكروباص الإشارة لغة الطريق.. والله العظيم الإشارة لغة الطريق أمر عجيب آخر ... من المعروف في أبجديات السواقة أنك لو أردت تغيير إتجاه سيرك ... فأنت تعبث في ذراع موجود في يسار عجلة القيادة .. وهي ذراع الإشارات (اللي هي كمان ذراع الإضاءة الخارجية للكشافات) ترفعها للأعلى فمعنى ذلك أنك ستلتزم يمين الطريق... تنزلها للأسفل فمعنى ذلك أن ستلتزم يسار الطريق (عشان يو تيرن مثلا) وفجأة تجد من كان خلفك قام بإسراع سيارته ونافسك بقوة لاغتنام 10 سنتمترات ظهرت أمامه لأنك مدي إشارة.. وعلى ماذا استقر المصريون حتى يؤكدوا مقولة إن الإشارة هي لغة الطريق؟؟؟ اختراع مصري صميم -زي اختراعاتنا الفريدة- .... تطلع إيدك عشان تنبه اللي وراك إنك داخل شمال ... ساعتها ح يشوفك ويفهم (رغم إنك مدي إشارة) إنك داخل شمال... بس فيه مشكلة... إفرض إنت داخل يمين وماكانش فيه حد راكب معاك في العربية... ح تطلع إيدك إزاي؟؟؟ التجربة أثبتت إن المفروض الواحد يلغي نظره عن الطريق قدامه وعلى شماله ويركز في المرايا اليمين عشان ياخده تاتا تاتا يعني واحدة واحدة ورغم إن الإشارة لغة الطريق.. ورغم الاختراع المصري الفريد لتدعيم إن الإشارة لغة الطريق بتطليع الإيد... تلاقي كمان ناس خلفك لا شافت الإشارة ولا شافت إيدك اللي طالعة برة... إيه الحل ... إسمع كلامي وإطلع بجسمك كله برة العربية. يمكن اللي خلفك يشوفك... مزاولات على طول الخط: - سائق ملاكي أرعن: فجأة فاكر تفسه مايكل شوماخر وعمال يعدي من اليمين للشمال وفاضل له ميلليمترات ويسيب علامة في عربيتك - سائق تاكسي 1 : متأكد أن اليمين بتاعه طول الوقت وله حق إنه يقف من غير ما يدي انتظار عشان يلحق يخطف زبون قبل التاكسي اللي ماشي قدامه ما ياخد الزبون قبله - سائق تاكسي 2: يكون جاي من يمينك ويدي كلاكس ويخش قبل ما تدرك أصلا إنه ح يعدي وهو بيضرب الكلاكس - سائق ميكروباص 1: فجأة لقى (زميله) ودخلوا في حوار ع الطريق .. وطب البشر اللي وراهم... استنوا شوية ما هي واقفة قدام - سائق ميكروباص 2: بيدور على فكة عشان معاهوش فكة يديها للزبون اللي دفع عشرة جنيه ومخدش الباقي - جدو أو تيتة: و دول كبار السن اللي معندهمش فكرة عن السواقة السريعة بس الحق لله هما سواقين شاطرين ... بطيئين بس شاطرين - النقل والتريلات: وخصوصا لو جمدت قلبك وقررت تطلع محور أو دائري... قافلين أقصى اليسار بالضبة والمفتاح (يعني شوفلك حارة تانية لأنه لا ح يسمع لك كلاكس ولا ح يبص لك في نور عالي) - المشاه (راجع مقدمة المقال) - أمين الشرطة الحرامي: اللي ما يصدق يلاقيك وعايز يطلعى منك بمصلحة.. على أي حاجة بقى... طفاية ... رخص ... إعاقة رؤية (يعني لو عندك فواحة في مراية العربية شيلها.. أصلهم بيغرموا عليها ب 20 جنيه تقريبا والسبب.. إعاقة الرؤية ... أي كلام في أي كلام) ولو أمين الشرطة معرفتوش مقامك ومقامه م الأول صدقني ح يطمع فيك ومش بعيد -والله العظيم- إنه يلاقيك واقف في الطريق ع اليمين في مكان مسموح فيه الانتظار ومشعل علامة الانتظار ... ويساومك بعد ما يشوف رخصك إنه ح يعملك جنحة عكس إتجاه... مع إنك واقف في طريق مفيهوش عكس إتجاه أساسا) أي كلام في أي كلام. دي يا جماعة خلاصة تجربة أقل من سنة في السواقة في شوارع المحروسة... لاحظوا اتكلمت عن القيادة أو السواقة فقط.. ومتكلمتش عن حال الطرق في مصر... ولا عشوائية قوانين المرور... ولا غياب الشرطة وظهورها بس في المواكب والمواسم زي رمضان.. ولا معاناة الترخيص والتجديد.. ولا ضحايا الحوادث في مصر.. ولا تطابق حال السيارات مع قوانين البيئة.. ولا لتر البنزين 92 اللي بيقولوا إنه ح يغلى... ولا سلوكيات المصريين في المواسم والأعياد وهجومهم كالقطيع على شوارع مصر في أيام رمضان وتاني وتالت يوم العيد و9 شهور من الدراسة تشعر فيهم بقيمة أيام الجمعة والسبت من كل أسبوع وتكره الخميس حتى لو كنت من عشاقه.... الخلاصة: الزحمة أصل كل المشاكل في مصر ... وهي بالتأكيد سبب أزمة المرور الحل: طول ما فيه بكرة ... لازم يكون فيه أمل .. وعشان نرتاح م الزحمة والمرور في القاهرة تعالوا نسمع كلام حكومتنا الرشيدة في حاجة كمان م اللي بتقوله لنا... بتسألوني نعمل إيه يعني!!!!! نرحل جميعا إلى الصحراء
