الجملة دى سمعتها من فنان كوميدى وعجبتنى اوى وفكرت فى معناها كتير وحسيت ان ليها علاقة بحاجات كتير فينا, منها السلبية والفضول وعقدة الخواجة, واكتشفت إنى مريت بتجارب كتير اوى بتأكد المعنى ده فحبيت اشارك الناس التجارب دى واحاول اعرف احنا ليه كده. - اول حاجة هيا السلبية ايه علاقة السلبية بالتليفزيون ؟ السلبية خلتنا نستغرب لما بنشوف حد بيحاول ياخد حقه او حتى بيتناقش ويتسائل اذا كان ده حقه ولا لأ ونقعد نتفرج عليه اكنه تليفزيون, متعودين من المدارس اننا ناخد المعلومة ونسكت ونحمد ربنا ان حد بيقولهالنا اصلن فلما ييجى المدرس يقول حاجة غلط وانت تحاول تصلحها تلاقى نفسك فجأة اتقلبت تليفزيون وكل الطلبة بتتفرج عليك وهما فاتحين بقهم, فمثلا ده موقف حصلى وانا فى تانية ثانوى, لقيت المدرسة فى الفصل بتقول " يا ولاد توأم يعنى تواينز" وانا عشان كنت بحب الافلام الانجليزى وبعرف بدائيات اللغة وعندى فكرة اكتر من المدرسة ف قلتلها "يا ميس اسمها توينز" قلتلى "ما هى تنفع تواينز وتنفع توينز واعدلى اللياقة واقعدى مكانك وبطلى رغى تيييييييت" ...... وبكده اول موقف حاولت ابقا فيها مش سلبية حسيت انى بعمل حاجة غلط. وموقف تانى لما كبرت بقه وقاعدة عند الدكتور وتجرأت واعترضت على نظام الحجز وانى قاعدة ملطوعة بالساعتين والتلاتة, طبعا اتفتح قدامى موشح من السكرتيرة فاضطريت ارد جامد وفجأة لقيت نفسى تليفزيون والناس بتتفرج فى منتهى الذهول وباهتمام شديد جدا كإنى مسلسل تركى مدبلج لدرجة إن اللى كان عليها الدور سابت الدكتور مستنى وقعدت تتفرج وهيه فاتحه بقها برده. - تانى حاجة بقه هيا الفضول: الفضول خلانا نتفرج على اى حاجة مش عندنا وموجودة عند اى حد تانى كأنها تليفزيون, فبمناسبة انى كنت اعرف توأم بتتقال ازاى بالانجليزى كان ربنا ليه حكمة فرزقنى بتوأم .ف كأى حد عايز يخرج ويتبسط بيهم جبتلهم عربية اطفال تشيلهم هما الاتنين ونزلت بيهم ورحت مول معروف, لقيت الناس بتتفرج علينا اكنى لابسة اراجوز مثلا او ماشية على ايدى ورجلى. مفيش انسان عدى قدامى غير لما اتفرج علينا وفصصنا لدرجة انهم يعملوا نفسهم بيشوفوا حاجة ورايا مثلا او راجعين نسيوا حاجة, وفى ناس مابتتكسفش ففى واحدة وقفت قدام العربية وبتقول ياخلاصى وانا عايزة اعدى ومش عارفة لحد ماجوزها زعقلها وشدها, يومها حسيت انى مش عايزة اخرج تانى وإنى مكسوفة جدا من كتر نظرات الناس. وموقف تانى حصلى بالعربية واحدة خبطت العربية من ورا ووقفنا فى الشارع نتناقش ووسعنا مكان للعربيات عشان تعدى وعشان منوقفش الشارع, لكن ازاى الناس تعدى موقف زى ده. كل العربيات فى الشارع اللى احنا فيه وفى الشارع الناحية التانية بيبطأوا عربايتهم عشان يتفرجوا على التليفزيون أصدى علينا وهما برضه فاتحين بقهم, وبقي الشارعين واقفين الشارع اللى فيه الحادثة والشارع الى جنبه اللى ملوش علاقة بالحادثة. - عقدة الخواجة اما بقه الموضوع ده جميل جدا احنا شعب اول مابنشوف واحدة اجنبية حلوة معدية لازم نتفرج عليها وخلاص, بنحس إنها فاهمة هيا بتعمل ايه, ايه هوا بقه ؟ مايهمناش مش مشكلتنا, مع انها انسانة طبيعية جدا ممكن تكون غبية او زكية عادى يعنى . فمثلا كنت فى سفارة من السفارات واقفة فى الطابور كأى حد مستنى دوره لقيت واحدة اجنببة حلوة جاية من اخر الطابور وبتعدى واحد ورا واحد وكلهم متنحين وبيتفرجوا عليها وهيا بتعديهم فى الدور وبتبتسملهم وبيبتسمولها لحد ما جت عندى وعايزة تعدينى فبقلها " لو سمحتي فى طابور يا ريت تقفى فيه" عملت نفسها عبيطة وبتقولى "انا بس عايزة اخد الباسبور" قلتلها "ما احنا كلنا واقفين هنا فى الطابور مستنين الباسبور. أمال مستنيين العيش اما ييجى " فقالت " سورى" ورجعت فى اخر الطابور والناس برده متنحين وبيتفرجوا عليا و هما فاتحين بقهم اكنى تليفزيون. انا كده قلتلكوا بعض المواقف إلي مريت بيها فى الحياة وعايزة كل واحد فينا يفكر ويشوف احنا ليه بقينا متفرجين ممتازين جدا ومش قادرين نبقى مخرجين ولا مؤلفين ولا حتى ممثلين.