ملعونة يا بحيرة السكات ملعونة يا كل الآهات ملعونة يا صرخة ألم، تبكى على كل اللى فات .. **** أنا وانتى .. وكل الناس بنتقابل ، توحدنا الصدف فكرة، تفرقنا الهموم مسافات نخاف نحلم نعيش بكرة تدوبنا صدى الآنات **** أنا وأنتى .. بتطحنَّا السكك ياما نلف الدنيا وندوَّر، عن الإنسان فى دوامة وأتوه منك وأدوب فيكى فى عز البرد ألاقيكى ، فى جوف النبض حلم وذات ! وأنا بيكى بعيد، عن كونى بنى آدم ، بيعشق حبه للذات **** أنا وانتى .. تصادفينى، فى يوم ترحالى أغنية ويوم قربى تكونى آهات وأواعدك ، يوم تكونى الشمس والمية تكونى الضى فى عينيه أشوف فيكى دموع حيرة وبحر سكات .! **** أنا و انتى.. جمعنا الحب فوق نيلك وكنت الآهة فى مواويلك بقيت لك ضى قنديلك ما قدرتيش .!! صرخت بحب من قلبى وما سمتعيش !! كتمت السر دا ف قلبى وقلت ضرورى راح تفهم ، وما فهمتيش .!! وياما كتير أقول يا مصر جوايا حبك دا بلا نهاية ، عاندتينى ، وهات تلطيش!! **** أنا وانتى.. سفينة ومركبة تاهت، وضاعت منها شطآنها، وأحزان فى العيون باتت، دموع تبكى لأوجاعها وقلت بحب يا عمرى ، وغيرك فى الحياة دى ما ليش !! وبرضه يا أمى ما فهمتيش !! وبرضه يا مصر ما فهمتيش !!