اوعى تنتبه لما قالته "المذيعة المنتسبة للإخوان" المدعوة آيات العرابي.. واللي اتكلمت وشتمت وشمتت في رحيل النجم الكبير المحترم ممدوح عبدالعليم.. ومش هاكرر ما قالته عرابي لأنه عيب ولأن الراحل أشرف وأطهر منها ومن اللي مشغلينها ومقبضينها.. والحقيقة أن غالبية من هم مثلها يجب أن يذهبوا مباشرة إلى مستشفى العباسية.. ده بجد ! وما قالته لا ينسينا أن عبدالعليم خريج العلوم السياسية كان واحد من أكثر نجوم الفنان احتراما.. ويكفي دموعه الصادقة في لقائه مع الإعلامي عمرو الليثي منذ شهور.. والذي قال فيه باكيا: "كان صعب عليا اشتغل وأنا شايف مصر بتتقطع وكان عندي احساس أن البلد دي زي المريض اللي في العناية المركزة لكن هتطلع وتبقى بخير ".- طب.. ندخل في أحوال بلدنا.. متنساش تقول لكل حبايبك المسيحين.. كل سنة وانتو طيبين.. واوعى تنسى أن الشمس تعامدت النهاردة الصبح على مقصورة الإله آمون داخل معبد الملكة حتشبسوت غرب الأقصر ومفيش سياح طبعًا.. ولا تنسى أن كريم بامبو بتاع الأهلي وقع لسموحة لمدة سنتين ونص ولا إن التلفزيون امبارح مذاعش حاااااجة خالص عن ممدوح عبدالعليم ولا غير الخريطة ولا حتى حط فيلم ع نايل سينما.. لازم تتحاكموا يا بتوع التلفزيون ! - وبمناسبة المحاكمة.. فمحكمة الاستئناف النهاردة طلعت حيثيات حكمها برد المستشار ناجي شحاتة المعروف إعلاميًا بقاضي الإعدام.. والمهم أن المحكمة قالت ايه: "أن من حق المتهم أن يطمئن لقاضيه الطبيعي.. وأن المتهم مش هيطمن للمستشار شحاتة لأنه تحدث في السياسية.. وأنه لم تتوفر الحيدة والحكم هيكون متحيز"، تحية لقضاء مصر اللي "مطبطش" على قاضي بل "اعطاه ما يستحق". - والحقيقة إني مش بجيب سيرة المستشار شحاتة إلا مع قدوم أخبار خاصة به.. وعليه فهفكر سعادتك أنه طلع في حوار مع "الوطن" قال كلام كله في السياسية وده مش من حق القاضي.. وإن كلامه ده سحب منه قضية خلية أوسيم.. وهيسحب منه قضايا تانية.. ومحدش يسألني تامر بلغ ولا لأ ..ليه بأه لأن تامر مش فاضي.. وقال في برنامج "الحياة اليوم" منتقدًا وائل الإبراشي لاستضافته مطربة "سيب ايدي"، وقال ناقل "الإباحي إباحي".. وانتقد يوسف الحسيني اللي استضاف سيد القمني، وقال: "ناقل الكفر كافر".. طب خد دي يا أستاذ تامر.. ووالله افتكرتها كده بالصدفة . - بص بأه.. امبارح ومع "المجتهدين خليل والشناوي" في قناة "الحياة" جابوا واحد مدعي نبوة اسمه "مؤنس".. ومؤنس قال: "الأهرامات مهبط الديانات على الأرض لذلك هي مقدسة عند الله"، وقال كمان أنه شاف ربنا قبل شروق الشمس ما بين الفجر والإشراق في حدائق الأهرام وتحدث معه".. وأنا حقيقي معرفش "مؤنس" ده شاف ازاي وفي أي بوابة.. وانت هتقول ايه.. طب مش هتقول.. طب مش هتبلغ .! - ووصلة الهرتلة دي تخليك تفتكر طالب اسمه محمد اتقتل النهاردة بالمطواة.. والقتل كان في مدرسة ثانوية زراعية بقويسنا.. ومحمد يا ولداه.. حاول يمنع مشاجرة في المدرسة بين زمايله بالمطاوي.. مطاوي في مدرسة.. تربية وتعليم ايه.. أفكرك إننا الدولة قبل الأخيرة في مستوى التعليم وقبل دولة غينيا الشقيقة.. ورقمنا 148 بين الدول..أيون . - وعشان " حبايبنا " الزملكاوية ميزعلوش.. مبروك ماتش امبارح واللي جاي أحلى.. بس ده ما ينسيكم إن رئيس النادي قال "فنكوش وهاسجن صاحبه" عن التسجيل الصوتي بين عضو مجلس اتحاد كرة القدم ورئيس لجنة الحكام ل"تظبيط" حكم ملاكي لكم.. والتسجيل ده اللي انفرد بيها رئيس رابطة النقاد الرياضيين محمد شبانة.. وطب وشبانة سكت !. - أبدًا مسكتش.. قال: "أنا مش بتاع فنكوش.. ومستني سيديهاتك اللي اتكلمت عنها انت من أسبوعين في مؤتمر صحفي.. وأنا بحارب الفساد في الجبلاية".. واللي تطلع بيه من القصة دي ايه بأه.. أقولك أنا.. لازم مجلس اتحاد كرة القدم المصري يتحل.. أي والله ..وليه ..عشان مصر ..بس كده. - وعشان كله ميبقاش ضرب.. ضرب.. ضرب.. قول: "يا فاتنًا لولاه ما هزني وجد.. ولا طعم الهوى طاب لي.. هذا فؤادي فامتلك أمره.. فاظلمه إن أحببت أو فاعدل.. من بريق الوجد في عينيك أشعلت حنيني.. وعلى دربك أنى رحت أرسلت عيوني والرؤى حولي غامت.. بين شكي ويقيني".