- النهاردة محكمة الاستئناف قبلت طلب الرد المقدم ضد المستشار ناجي شحاتة في قضية "خلية أوسيم" وده أول طلب رد لقاضي ويتقبل منذ سنييييييييييييييييييييييييييين طويلة.. أي والله.
وعليه فالقاضي "شحاتة" لن يتمكن من نظر هذه القضية، وقاضي تاني هينظرها، وهل ده بس هو المهم؟ أبدًا يا سيدي.
- المهم أن أي قضية بينظرها المستشار شحاتة "هتتسحب" منه بسبب قرار الاستئناف النهاردة، وأبرز المحاكمات دي: محاكمة المتهمين في أحداث مجلس الوزراء، ومحاكمة غزلان في قضية "غرفة عمليات رابعة" ومحاكمة 26 متهمًا في قضية "خلية الجيزة".. الله طب عمل إيه لده كله؟ .
- أقولك أنا، هو طلع في حوار مع "الوطن" وظهر "هواه السياسي" في الحوار وانحيازه، وده ممنوع على القضاة ووصف 25 يناير ب"25 خساير"، وكمان تحدّث عن بعض الإعلاميين وقال إنّه قفش واحد منهم مليون مرة في ملهيين بالزمالك والواحد اسمه تامر، وتامر ده حقه يبلغ ويتهم ناجي شحاتة، وتامر مبلغش، ولا هيبلغ !
- وبمناسبة الأحكام والملاهي الليلية والإعلاميين، فالأستاذ وائل الإبراشي استضاف أمس "الست" المعروفة إعلاميًا ب"مطربة سيب إيدي" واسمها سلمى الفولي، واللي اتقفشت من 8 شهور وحطوا كلابش في ايديها بسبب فيديو خادش للحياء للعام وهي بتغني، طب ده هو بس المهم .
- الأهم بأه، أن سلمي الفولي حسب ما رصد صديقي وزميلي الكاتب محمد عبدالرحمن قالت: "أنا اتحبست 6 شهور وعليا مراقبة 6 شهور في قسم العجوزة وبسلم نفسي 6 المغرب وبطلع 6 الصبح"، تمام كده، طب يا ست إزاي بتقضي من 6 ل 6 في القسم وأنتِ في برنامج ع الهواء مباشرة والساعة داخلة على 2 بالليل، طب فين ضباط العجوزة والمراقبة!!.
- جبنا سيرة الضباط، فوزير الداخلية أوقف 3 ضباط عن العمل ونقل 2 في الشيخ زايد بالجيزة، ليه بأه؟، لأنهم راحوا يقبضوا على خادمة غينية لتنفيذ حكم وهي كلمتهم من ورا الباب ومافهموش حاجة فراحوا كاسرين الباب، والباب ده لا مؤاخذة طلع باب سفير غينيا، واللي كلّم الوزير واشتكى وكده، والموضوع كبر وحصل اللي حصل .
- وده على طول يفكرك بضابط في مرور الإسكندرية برتبة نقيب، اتفق مع 4 تجار مخدرات أنه ينقلهم شحنة مخدرات من البحر الأحمر لإسكندرية وياخد 10 آلاف جنيه، المهم أنّه نقل الحاجة في عربيته وكان معاه تاجر منهم ووصلوا شقة الضابط، والتاجر استغل نوم الضابط، وأخد المخدرات وعربية الضابط وهرب، والشرطة حاليًا بتدور ع الضابط وعلى التجار الأربعة والمخدرات والعربية، أي والله وده انفرد بيه من شوية موقع "انفراد" الذي يترأسه زميلنا المتألق محمود مملوك.
- وكل هم الضباط ده ما ينسيك بطولات ضباطنا "جيش وشرطة" في سيناء، واللي بينفذوا عملية "حق الشهيد" وتخلصوا من 65 إرهابيًا ودمروا بعض المخازن في آخر يومين، وسقط أكثر من 5 من ضباطنا شهداء، وده يفكرك برضه بأن كوبري السلام الذي يربط سيناء بالدلتا والقاهرة ويقع أعلى قناة السويس، اتفتح من جديد بعد توقف استمر سنوااااااات، وده هيسهل مرور السيارات والبشر خاصة من أبناء سيناء والوادي .
- وأوعى ده ينسيك أن متعب جاب جون في الدقيقة 96 إمبارح، ورغم إن الماتش عادي وب3 بنط لكن شفنا فرحة كبيرة جدًا، وهب "خناقة بلدي" بين اللاعبين، دي "لكمة" وده شلوت، وده يشتم، وده يجري، بس ده ما ينسيك إن موقع "فيفا" وصف الهدف ب"المذهل"، والحقيقة إن متعب أحرز حوالي 15 هدفًا حاسمًا بعد الدقيقة 90، أولها هدفه في 2003 ضد كوت دي فوار في أمم إفريقيا للشباب، وهدفه في الجزائر نوفمبر 2009 تصفيات كأس العالم، وهدفه في سيوي سبورت كونفدرالية 2014.
- طب نعكنن ع الأهلاوية شوية؟، نعكنن.. إمبارح الحضري في لقاء بقناة "الحياة" قال: "أنا كان نفسي أبو تريكة يجيب فيّ جون، لأن ده شرف ليا"، والحقيقة إن ده فكرني إن الحضري منذ ترك الأهلي واجه ناديه في 9 مقابلات رسمية مع الزمالك والإسماعيلي والاتحاد والمصري ودجلة، والحقيقة إن الأهلي مكسبش أي فرقة كان الحضري واقف لها جووووووووووووووون، أي والله .
- وبعدين، وعشان كله ميبقاش ضرب، ضرب، ضرب، قول: "أنا كنت مين وفين قبل ما أشوفك وأقابلك، وإزاي عشت السنين، إزاي يا حبيبي قبلك، أول مرة اتقابلنا عرفت إني هحبك، آخر مرة اتقابلنا أكتر مرة بحبك".