- إن صحت "تسريبات" تعيين المستشار عدلي منصور في قائمة المعينين بالبرلمان، ثم اختياره رئيسًا له بالانتخاب.. هيكون ده محاولة لضبط وتقليل فواصل "العك" في هذا المجلس.. وظني إن الوقار الذي عليه الرجل هيمنع "قليلًا" من الهرتلة.. وهيمنح "قليلًا" من الهدوء.. أهو "قليله" أحسن من عدمه. - والحقيقة أن اللخبطة مستمرة.. 4 مواقع إخبارية قالت إمبارح إنه هيتعين.. والخبر اتنفى.. والمتحدث باسم الدستورية العليا الساعة واحدة وتلت من صباح اليوم قال: "مفيش حاجة".. والمستشار عدلي الساعة واحدة ونص الضهر قال: "ربنا يسهل".. ربنا يسهل. - ولو تفتكروا أيام الانتخابات كانت الفكرة اللي ماشية في البلد وفي غالبية الدواير: "ربنا يولي من يصرف".. والمرة دي في قصة رئاسة البرلمان وأهميتها.. خلينا نقول ربنا يولي من يصلح".. بس كده - وزي ما قلنا يوم السبت اللي فات هنا في "لا تنسى" أن أول جلسة يوم 10 يناير.. فالمستشار مجدي العجاتي وزير الدولة لشؤون المجالس النيابية، قال من شوية: "أول جلسة هتكون يوم 10 يناير".. طب وعكاشة هيكون فين؟!.. حقيقي المستشار عجاتي مقالش.. بس أنا هقولك. - زي ما تابعتوا إمبارح.. في عكاشة لا قدم طلب سفر أو هجرة لألمانيا عشان يقيم هناك حتى "تغيير النظام" فالسفارة الألمانية قالت: "ولا شفناه".. ولا هيستقيل زي ما أوهمنا وعمل توكيل للسيدة الفاضلة والدته.. وهتلاقيه في البرلمان "راشق" من أول يوم.. أي والله.. بس هو مصدوم "حبتين" بسبب قصة عدلي منصور.. أصله كان "عشمانًا ومتعشمًا". - طب وبالنسبة ل"إيقاف برنامجه" 6 أشهر.. أقولك.. ده مش هيمنع "عكاشة" من الظهور.. يعني قرار والعدم واحد.. أيون.. واحد.. ليه بأه.. لأن القرار مرتبط بالبرنامج مش "عكاشة".. يعني البرنامج ممكن يسميه "مصر بالليل.. أو مع توفيق"، ويطلع عادي هو والسيدة حياة الدرديري! ..نقول كمان ولا مفهومة. - واللي بيسألك عن موقف الأستاذ مرتضى منصور من "قصة عدلي منصور".. أقول إنه قبل كده قال مينفعش.. وهو حاليًا - مرتضى يعني - عامل اجتماع مع باكيتا والجهاز المعاون.. وزعلااان على الماتش بتاع امبارح والتعادل مع بتروجيب.. بس كده. - واحترام وشياكة أحمد جعفر إمبارح بعد ما جاب جون في ناديه السابق ما ينسيك أبدًا أن محمد النني بيعمل اختبارات طبية في الأرسنال.. وما ينسيك إن كل ما الزملكاوية يشتموا في الأهلي "يتعوروا".. يعني فرحوا في الهزيمة من سموحة.. شالوا تلاتة من الجيش.. فرحوابالتعادل مع دجلة.. اتعادلوا بالعافية مع بتروجيب.. يعني ركزوا مع فريقكم أحسن. - وده كل ما ينسيك إن رئيس الوزراء شريف إسماعيل قال من شوية: أنا ك مواطن اتبسطت من 2015.. وكل سنة والشعب بألف خير"، والحقيقة يفكرك هنا بفيلم "كلمني شكرًا".. لما عمرو عبدالجليل قال: "بس أنا ك عاطف اتبسطت.. رغم إني كنت بصرخ وأقوله.. سيبني.. سيبني".. أي والله. - وعن سد النهضة.. أقولك: "أصبح الموضوع منتهيًا وتحصيل حاصل والسد هيتعمل".. وأهو بنتفاوض عشان حصة المياه، واتفقنا على مكتب استشاري جديد.. ونكتب شوية عقود.. ونحاول نعمل أي حاجة. - للأسف ده فكرني بموضوع الطياريتن اللي اتكلم عنهم أيمن نور في اجتماع مرسي "السري" اللي كان على الهواء مباشرة من سنتين لحل القصة، وقال "نهوش إثيوبيا".. والحقيقة إن موضوع السد لا يتحمله "السيسي لوحده ولا مرسي لوحده".. والحقيقة إنه تراجع لدور مصر إفريقيًا.. إفريقيا اللي بعض شوارع عواصمها الرئيسية بتحمل اسم الرئيس عبدالناصر وصوره.. نسيناها ف نسيتنا مع شوية تدخلات وحسابات دولية كده! بس. - وعشان كله ميبقاش ضرب.. ضرب.. ضرب.. ممكن نقول: "القمر طلع.. والخوف بعد.. والهوى دفي والليل سمع.. والأمان في عينيها.. حسيت إني عديت للأمان في عينيها.. والحنان خد مني وادفا.. ياللي محروم من الحنان #حبيبي_أنت