العلاقة بين الأخ وأخته في مجتمعنا الشرقي علاقة غريبة جداً، بيكون السبب في عنصريتها تجاه البنت الأب والأم نفسهم وأحياناً الأقارب أو الوسط المحيط. في البداية الأخت بتكبر وهيا عارفة كويس إن أخوها ده ليه ضعفها في كل حاجة بعد رحيل الوالدين، وده طبعاً تشريع ديني ،حاول بعض الفقهاء تبريره بأن الأخ يكون مسؤلاًعن أخته مسؤولية كاملة بعد رحيل الوالد أو غدر الزوج أو جحود الأولاد. ورغم تقبٌل البنات لهذا التشريع لدرجة الوصول اوقات للتنازل تماماً عن ورثها لأخوها، إلا إنه من الظلم البيّن إن البنت بتتربى على إنها زي أخوها بالضبط في الواجبات والمسؤليات ، وبتكون عارفة كويس جداً إنه ليه ضعفها في كل شيئ بعد رحيل الآباء، ورغم ده بنلاقيها بتاخد ضعف الولد بس في الحساب والعقاب، بتاخد ضعف الولد بس في تقييد الحرية والحجر عالطموح. مجتمعاتنا الشرقية بتمارس عنصريّة مرعبة ناحية البنات، خصوصاً في القرى والأرياف، كلمة صغيرة تافهة من أصغر ذكر ممكن تمشي على رقبة أكبر إخواته البنات وممكن على أمه كمان!!!!! فكرة إن للذكر مثل حظ الأنثيين لم تعد تشريعا يخص الورث بالعكس، بقا إسلوب حياة، لدرجة إن في ناس بيدوا الولد ضعف البنت في العيدية،ضعف البنت في الإهتمام، في ناس بيوصل بيهم الظلم إنهم يدخلوا الولد مدرسة خاصة ويرموا البنات في مدارس حكومة، في ناس بيوصل بيهم الإستبداد لتسخير البنت لخدمة أخوها بغسيل لبسه وتسخين أكله وكوي هدومه وساعات كمان تلميع جزمته!!!! في ناس بتدخّل الولد جامعة خاصة لما مايجيبش مجموع وبنتهم يرموها في أي كلية لو حصل معاها نفس الموقف، في ناس بيخللوا الولد هوا اللي يتعلم السواقة وهوا اللي يشتري عربية ويسيبوا بنتهم تتبهدل في المترو والمواصلات وفي نفس الوقت يفرضوا عليها تلبس بشكل معيّن وترجع في ميعاد محدد وقبل الخروج تلاقي نظرة حادة من الأب أو الأم أو حتى الأخ مصحوبة بكلمة: إوعي تخللي حد يعاكسك!!!!!! رغم إنهم عارفين إن أخوها بيعاكس بنات زيّها بالعربية اللي اشتروهاله، ورغم إنها هيا اللي كانت أولى بالعربية لو بيخافوا عليها قوي من المعاكسة، بس صحيح أنا نسيت، دي بنت، احنا مانجيبلهاش ،تستنا لما يجيلها العريس ويبقا يجيبلها هوّا، وبعد كده يستغربوا إن البنات بقا عندها فوبيا عدم الزواج رغم حصولهم على الشهادات والوظائف، لأنها إتربت من صغرها على إنها نص مش إنسان كامل ، والنص لازم يدوّر على اللي يكمّل نقصه. نيجي بقا لما البنت والولد بيغلطوا، لو إتعرف إن البنت على علاقة بشاب، هل بيكون نفس رد الفعل لما بيتعرف إن الشاب على علاقة ببنت؟؟!! أعتقد موقف البنت بيتم التعامل معاه على إنه مصيبة، لكن موقف الولد بيتم إستقباله بفرحة الإبن اللي كبر وبقا راجل بيعرف يعلّق البنات!! طبعاًناس كتير هتقوللي إحنا مجتمع شرقي والبنت بيتخاف عليها عشان شرفها وسمعتهاما يتمسوش، بس بعيداً عن موضوع الشرف اللي دولةالصين وجدتله حل بأبخس الأثمان،ممكن افهم ليه بتختزلوا حق البنت الطبيعي في إنها تغلط؟؟!! وتفهم غلطت ليه، وتبدأ تفكّر إزاي تصلّح غلطها أو ماتكرروش تاني!!!! ياريت نكتفي بإعتبار المرأة نصف الرجل في الورث والشهادة لأن دي قواعد متعلقة بالدين مش مجال حديثنا دلوقتي، مفيش داعي ننقل الفكر ده لحياة بناتنا ونخليهم يحسوا الإحساس ده من الطفولة، حاولوا تدوا بناتكم الحنان والعطف وتأمنولهم مستقبلهم وحياتهم ضد غدر الزمن، ساعدوا بناتكم يتعلموا ويشتغلوا ويستقلّوا مادياً وما يحتاجوش حاجة من حد، خليكم عارفين إن العدل هو سبب السلام النفسي وإن ظلم البنات نقيصة وعيب خُلقي جسيم في مجتمع يزعم الخوف من الله وحسابه . سيبوا البنات يعيشوا إنسانيتهم عالأقل بشكل كامل، سيبوهم يحسوا إن ليهم حق كامل عالأقل في الحياة. راجعوا نفسكم يامجتمع بيدي البنت ضعف الولد في العقاب.. زي الولد في المسؤوليات والأعباء..ونصفه في الميراث بنص تشريعي.. ونصفه في حق الحياة بظلم مجتمعي وعنصري.
