كتبت ندى سلامة - عازفة الناي التي تناقل مستخدمو مواقع التواصل الاجتماعي وبعض المواقع الإخبارية نبأ انتحارها صباح اليوم- تدوينة عبر صفحتها على "فيسبوك" تؤكد فيه أنها لاتزال على قيد الحياة ولم تنتحر. وقالت "ندى"، "أنا ندى ولسه عايشة لو معنى إني بتنفس إني لسه عايشة، يمكن ده هيكون أطول شيء اكتبه ويمكن يكون آخر شيء اكتبه واهتم للناس فأكتبلهم". وأضافت: "أنا حاولت انتحر أكتر من 5 مرات في 3 أيام وكل ده عشان بواجه مشاكل زي اللي الناس بتقابلها، بس المشاكل دي كانت أكبر مني ومكنتش عايزة أورط حد فيها لأنها كلها مشاكل أنا السبب فيها.. أنا اللي عملتها بس كنت جبانة إني أواجهها". وتابعت، "الموت شيء عظيم ممكن يخلصك من مشاكلك في دقيقة ويخلي كل الناس تسامحك، بس الغريب هما ليه مهتمين بوجود الجسد كله بيدور حوالين جسدك طول ما جسدك موجود هيكرهوك وأول ما يختفي هيحبوك، إن كان الاعتذار واجب فبعتذر للناس اللي مش مهتمة لوجودك بس أنت اللي تهمهم في أي مكان، هتعامل مع مشاكلي وانهيها واخد فرصة جديدة للحياة في عالم". واستكملت: "وفر أي طاقه تفكير هتفكر فيها عني وعن حياتي أو عن موتي أو عن مشاكلي أو عن علاقتك بيا وفرها لحياتك في العالم، ووفر أي محاولة تواصل معايا حاليًا، أنا شخص غير جيد لأي شيء في الحياة لحد ما ابقي جيدة كفاية لنفسي، إكرهني أو حبني ده مش هيغير شيء في يومك".