حرصت الفنانة والإعلامية ميار الببلاوي، على طمأنة جمهورها بشأن حالتها الصحية، قائلة «إنها لاتزال تلزم الفراش لليوم الثاني على التوالي وبدون حركة، الأطباء قالوا لي مينفعش أمشي على الأرض خالص»، كما وجهت الشكر إلى زملائها وجمهورها، لدعمهم الكبير لها، خلال اليومين الماضيين: «بقيت مكسوفة من الناس أوي، عشان أخباري كلها عن مرضي وبس، خايفة أكون بصدر لهم طاقة سلبية، والله ده غصب عني مش بإيدي». وأكدت الببلاوى فى تصريح ل«الوطن»، أنها تعرضت لآلام شديدة، أول أمس، بعد سقوط «ضرفة الدولاب» على قدمها، ما تسبب فى كسر 4 أصابع، قائلة: «شفت وجع لا يحتمل.. ربنا ما يكتبه على حد». الببلاوى: «متعرفوش أنا مين ولا إيه؟.. هطلع لكم لايف» وأضافت: «حصل لي نزيف جامد جدًا، خصوصًا إني باخد علاج سيولة عشان القلب، وده زود النزيف أكتر، وكنت لابسة بيجامة في البيت عادي، واضطريت إن ألبس إسدال وأنزل على المستشفى بسرعة». وتابعت: «أول ما وصلت المستشفى، لاقيتني باتعامل عادي جدًا، رغم إني كنت بنزف، وقالوا استني طبيب الجراحة لسه هيجي بعد 5 ساعات»، مضيفة: «خلعت الماسك اللي كنت لابساه، وقلت لهم أنا ميار الببلاوي ها تتعدلوا معايا ولا أعمل إيه؟». ميار الببلاوي: «الدكتور جالي في 10 دقايق» واستطردت: «الدكاترة كانت بتتعامل معايا عادي، وقالوا لازم نستنى دكتور الجراحة هيجي الساعة 4، وكنا وقتها الساعة 11 الضهر.. يعني لسه هستني 5 ساعات.. قلت لهم هاعمل لايف حالًا وأقول اللي بيحصل معايا.. ده أنا بموت»، مضيفة: «لاقيت الموضوع اختلف تمامًا وخدت بنج وعالجوني.. والدكتور اللي كان هايجي بعد 5 ساعات جه في خلال 10 دقايق.. معرفش ليه بيعملوا كده؟».