هو: نازل أتفرج ع الماتش. هى: طب ما تقعد ونتفرج مع بعض. هو: ربى لا أسالك رد القضاء ولكن أسألك اللطف فيه. هى: هما اللعيبة بيتفوا كتير ليه، إيه القرف ده؟ هو: بيتفوا ع الحكم. هى: طب عصام "الشويحى" بيحفظ أسماء كل اللعيبه دول إزاى؟ هو: أكل عيشه. هى: طب إزاى فيه لعيب إسود فى الإرجنتين، هيا الإرجنتين فيها سود؟ هو: فيها. هى: لأ، مافيهاش. هو: خلاص مافيهاش. هى: انت بتريح دماغك. هو: أه. هى: بس على فكره الكوتشى الأحمر مش لايق ع الطقم الأزرق. هو: فعلا. هى: هو المعلق بياخد كام ف الماتش؟ هو: عشره ألاف دولار. هى: طب والمذيع المصرى؟ هو: يا دوبك يعشوه وياخد علبه سجاير وهو مروّح. هى: جوووووون. هو: لا ده أوفسايد. هى: أوفسايد. هو: لا ده جووووووووووووون. هى: هو فيه تغيير حكم؟ هو: إزاى يعنى؟ هى: أصل فيه حكم بيجرى ع الخط وشايل علم. هو: ده حكم الراية بتاع الأوفسايد يعنى. هى: أعملك تتعشى؟ هو: يا فرج الله.. ياريت. هى: عشا خفيف وإلا إيه؟ هو: لأ، خفيف إيه، ده أنا عايز محشى ورق عنب، ويكون الورق مترقم عشان متلخبطش، أنا بحب النظام فى كل حاجة. هى: طب آخر سؤال قبل ما أقوم أحضّر العشا، مين فيهم مارادونا؟ هو: ولا واحد. هى: أمال هو فين؟ هو: إنتحر. هى: يا ساتر يارب، ليه؟ هو: كان قاعد بيتفرج مع مراته ع الماتش. تمت