قبل حلفانه اليمين حلفوه إنه مش ها يخون يمينه إنه مش ها يبيع بلاده ولا هايتاجر بدينه ولا هايورث ولاده عرفوه إنه ليه منها المرتب والإقامة والتذاكر وان شغله يكون مرتب والحراسة بالعساكر وان لينا منه عدله وان إيده تكون نضيفه وان يتشطر ف شغله والبطانة تكون شريفه نبهوه ان مصر كبيره جامد وانها أم البلاد ليها شعب بطبعه عابد بس كافر ف العناد فهموه اننا ولاد الغلابه ياما شفنا في الطفوله من مصايب أو هزايم ف الشباب أو ف الكهوله بس ف الآخر ودايماً احنا حققنا البطوله حذروه م العمالة والخيانة وإنه يسند ضهره بره ولا يلعب بالديانه فالمسره تكون مضره ارحموه من نفاق اللي نافقوا أي واحد تحته كرسي من أرامل اللي سبقو حبه حسني وحبه مرسي خوفوه بالسجون لو كان ها يظلم أو هايسرق أو يخون وإنه لازم برده يفهم إننا دولة قانون بعد حلفانه اليمين اسندوه أيدوه أجِلُوا كل المطالب عارضوا بس بدون مخالب لو صلح يبقى استفدنا لو فسد يبقى اخلعوه وهاتوا حد يصون بلدنا لما يعرف كل حاكم ان عتبات المحاكم هي أخرة كل ظالم واننا طلقنا خوفنا