قال يوسف أباظة، أحد المتعافين من فيروس كورونا، إنه أصيب ببرد وصداع استمر 3 أيام وفي اليوم الرابع بدأ يشعر بتعب شديد. وأضاف خلال مداخلة هاتفية مع الإعلامي خالد أبو بكر مقدم برنامج "كل يوم"، عبر شاشة "ON E": "بدأت أتعب وأحس بسخونية وإرهاق، وكنت مفكر إن اللي عندي دور برد خفيف وهيروح لوحده، وكل دا وأنا في لندن، وفي اليوم الخامس كنت مرهق جدا وحاسس بسخونية رهية". وتابع: "اليوم السادس حسيت بتعب شديد وجسمي مكسر ورعشة قوية جدا، وباخد أدوية والسخونية مش راضية تنزل، وبعدين كلمت خدمة شبيهة بالرقم الساخن الخاص بوزارة الصحة، قلتلهم الأعراض عشان يدوني نصيحة، وقالولي خد (باراساتامول) ونام، والصبح جالي ضيق تنفس شديد وضغط في صدري وكلمتهم تاني وقالولي تعالى بكرا اعمل تحليل كورونا، وخد قرصين (باراساتامول) كل 4 ساعات عشان تسيطر على الحراراة، وحللت تاني يوم وكنت أحسن بكتير، والسبت مكنش فيه حرارة ولا محتاج دوا، وكان فيه ضيق تنفس لكن خفيف ومش موقفني إني أعمل حاجة". واستطرد: "قابلت الدكتور في لندن وسألته وقلتله المفروض عندي طيارة بكرا ومسافر مصر هل أسافر ولا لأ، وقالي مفيش مشكلة خالص، أنت بنسبة 98% معندكش كورونا، واتخذت احتياطاتي قبل مطلع الطيارة ولبست كمامة وكان معايا معقم وأخدت بالي، ومكنش فيه أعراض خالص، وبلغوني بعد موصلت مصر إن النتيجة إيجابية فعزلت نفسي في بيتي وأخدت بالي من كل حاجة وعزلت نفسي ومتعاملتش مع أهلي، وكنت باكل كويس وباخد فيتامين سي كل يوم الصبح وبشرب سوايل كتيرة ومكنش فيه أي أعراض".