شعب غريب، تركيبته عجيبة، ينام بالسنين وتنادى عليه ما يردش، ولما يصحى ويفور، تبوس إيديه يهدا، أبداً ما يرجعش! شعب عايش على ماضيه، ولما حاول يروح للمستقبل، تاه وغرق فى الواقع، لا عاجبه اللى فات، ولا اللى جاى، ولو سألته طيب عاوز إيه: يسقط يسقط حكم العسكر!.. طيب والإخوان: يسقط يسقط حكم المرشد!! لو حكم مدنى ينفع مين؟ مثلاً حمدين: يسقط يسقط بين الاتنين! تعالوا نبص من 25 يناير، يسقط شفيق رمز الفلول.. يسقط عصام شرف رئيس حكومة الميدان، نايم فى أحضان المجلس العسكرى.. يسقط الجنزورى الرجل العجوز.. بالمرة يسقط المجلس العسكرى!! ... صمت، انتخابات، الإخوان فى الحكم، فشل وصراخ وصراع وظلام وإحباط، و.. وفى ظل حكم يحمل لافتة الإسلام هو الحل، تزداد أعداد الملحدين فى بر مصر، والنتيجة: الشعب يريد إسقاط النظام! 30 يونيو، خروج شعبى مذهل، أخيراً مصر بلا إخوان فى 3 يوليو، أكيد مشاكلنا هتتحل، مش هنكرر أخطاء الماضى، هنبنى بجد بقى. حكومة جديدة، الببلاوى الليبرالى بطىء، غاوى قعدة مكاتب، البرادعى عميل خلع فى أول ملف، وزياد بهاء الدين طابور خامس، والكهرباء لسه بتقطع، والبنزين فيه أزمة، والعيش طوابير، إلحق يا مؤقت، البلد بتفك، والناس مش راضية.. زادت الرواتب أضعافاً والشغل أقل، والإضرابات زادت، والدعم زى ما هو، حدش قادر يقرب منه، بيقولوا هناخد من الأغنياء وندى الفقراء، طيب خايفين من إيه، ما تعملوا كده، والفقرا أغلبية، هيهتفوا بحياتكم، أبداً أبداً، لسه العذاب جاى!! بلاها ببلاوى، هاتوا محلب، رجل نشيط ما بينامش، مسئول ميدانى بصحيح.. حكومة جديدة، لكن تعمل إيه، كل يوم تفجير، ونور مقطوع، ومصانع عطلانة، وأطباء مضربين، وقبايل بتقتل فى بعض فى أسوان، ومحدش عاجبه أى حاجة وأى حد، ورئيس الوزراء مبيقعدش فى مكتبه، رايح جاى بين المحافظات، بدل ما يشتغل ويحط خطط، قاعد يطفى حرايق، والحرايق مبتطفيش.. هيروح محلب وييجى محلب ومفيش حاجة هتتغير! لا السيسى ولا حمدين هيقدر يغير فينا ولا ينور بيوتنا وشوارعنا، ولا يلم شمل اللى اتقطع، لأننا: ■ عاوزين زيادة فى الرواتب بس ما نشتغلش. ■ عاوزين الكهرباء ما تتقطعش بس ما ندفعش. ■ عاوزين دعم البنزين للفقراء اللى ما عندهمش عربيات. ■ عاوزين الأمن واحنا بنحرق ونقتل ونسرق ونتحرش. ■ عاوزين نفضل نقول إننا أكتر شعب متدين وإحنا بنعمل كل حاجة ملهاش علاقة بالدين. ■ عاوزين رئيس مش هنلاقيه أبداً لسبب بسيط وسهل يختصر الواقع: كل واحد شايف نفسه بس إن هو الفاهم والعارف والقادر.. هو الرئيس!!