استنوا استنوا.. دي مش قصة عاطفية هاحكي فيها عنها، قابلتها.. حبتها.. نظرة.. ابتسامة.. لقاء.. جواز.. طلاق.. النهاية. دي مش قصة أساسًا، عطيات يا أسيادنا، وما سيدي إلا أنا.. سيد نفسي ولا مؤاخذة. مريضة كانت عندي في العناية بمكان أستطيع فقط أن أخبركم اسمه وعليكم انتو الباقي تعرفوا قد إيه الخدمة الطبية الممتازة اللي بنخدمها للناس في هذا المكان العظيم، مستشفى أم زغيو التعليمي. حاجة كدة زي أم التيت.. أم بدرة.. أم علي.. أم المصريين؟. المهم مطوّلش عليكم.. قولوا طوّل :) الست عندها 46 سنة كانت حرارتها عالية شويتين ماشي ربو شعبي ماشي خلل بضربات القلب ماشي كله ماشي.. آه صحيح زيها زي أي واحدة من الآلاف الوحايد الموجودين في مصرالمحروسة. مش عارف صحيح محروسة من إيه؟ دي فيها كل العبر. تعبانة الست.. دخلوها المستشفى.. تعبانة أكتر.. دخلوها العناية.. تعبانة أكتر وأكتر هاتولها الاستشاري، برضو تعبانة خلاص حولوها الحميات.. اطلبوا الإسعاف؟ يا أستاذ زيزو اقصدي عبدالعزيز، رد بود شديد موجهًا نظره لهناك.. حاضر يا دكتووووووووووووووور. ساعة... ساعتين...تلاتة، الحمد لله جات العربية. داخل استقبال الحميات الساعة الواحدة الصبح بدري.. أهلاً أهلاً معايا حالة عايز أسلمها.. أهلاً أهلين هي ناقصة، ردت الدكتورة بلسان حالها: الحالة سخنة؟؟ طاب ما تعالجوها؟ ماهي مبتتعالجش؟ ليه؟ طاب دي شكلها محتاجة عناية ؟.. هكذا من المنظر العام، ثم إن أنا معنديش مكان.. فوت بكرة جاي ليه شحنة.. أماكن لوز اللوز من الصين، ولو عديت الجمعة الجاية جاي ليه مكانين جامدين من شلولو. تابعت قائلة: طب روح بيها مطرح مطروح إن شاء الله مطروح الجو هناك تحفة يا عمورة؟؟.. أنا عوض مش عمرو؟ خلاص يا سيدي أنا غلطانة، طب الست تعبانة والله تعبانة، طب أكسجين أي حاجة نفتالين بلي أي حاجة ؟. قيسوا الحرارة حتى؟ الله الله دي 40.. سبحان الله سبحان الله، طب اعمل إيه اعمل إيه؟ أكيد السؤال ده مش أنا اللي بسأل السؤال...دا الأقارب العقارب. طب روحوا الميري يلا بينا يلا يلا السعاف جاهز؟ المريضة جاهزة؟ الأقارب جاهزين؟ أنا جاهز؟ الأكسجين؟ مفيش، مش مهم انفخولها بقى.. درجن درجن درجن، واللي ميعرفش درجن دي صوت الإسعاف المصري. الله الله أنا شايف على مرمى البصر بوابة الميري الله أكبر الله أكبر عبرنا بيها القناة، ومعرفتش أدخل الحالة الميري أصلهم إجازة النهارده. انتم مش عارفين النهارده عيد ميلاد توتو، واحنا بناخد إجازة يوم ميلاد توتو ويوم طهارة توتو الله يخرب بيت أم نونو ع توتو. يلا يا ابني نروح تموت في البيت أحسن يا الله. ماتت سعاد. قصدي عطيات.. ذي ما ماتت قبلها 100 سعاد، وهانم وسعدية وسميرة وصبرية وسوسن وجاكلين وست الكل وأم محمد وكتيييييييييييييير، نفس السيناريو بيكرر نفسه بنفسه. لا تمرضي موتي أحسن أوفر في الوقت والفلوس والمجهود. أنا عن نفسي آسف يا عطيات.. لا أنا مش آسف أنا مالي. أنا آسف لكل محبي اللغة العربية التي راعيت وبكل دقة ألا ألتزم بنحوها وبلاغتها في كتابة ما سبق.