- ملعون أبو الدولة لما تصرف مليارات من دم الشعب المقهور على التعليم الجامعى علشان فى الآخر نشوف شوية بلطجية كل يوم بيتظاهروا ويكسروا ويخربوا فى الجامعات ويطردوا الطلبة من محاضراتهم والدولة، لا مؤاخذة، عاملة نفسها نايمة.. - ملعون أبو الثورة لما تطلّع أسوأ ما فينا وتبقى شغلانة اللى مالوش شغلانة والاسم ثورجى وفى الآخر ميعرفش هو بيثور ليه، والاسم ناشط مناضل! وكل واحد منا فى الأساس محتاج يثور على نفسه الأول.. - ملعون أبو المثل اللى بيقول الجنة من غير ناس ما تنداس واحنا كل يوم بنتصدم فى ناس كنا فاكرينهم بنى آدمين.. - ملعون أبو الشرف لما يتقمصه أشكال ضالة، الرذيلة جزء لا يتجزأ منهم وهوايتهم الخيانة وانعدام الضمير.. - ملعون أبو الحرية لما ينادى بها شخصيات مريضة، القمع حياتهم.. - ملعون أبو العدل لما يتغنى به ظالمون وظلمهم بين.. - ملعون أبو الطيبة لما الناس تفتكرها هبل وخيبة.. - ملعون أبو الدنيا لما تمشى بضهرها، والناس ماشية فى الاتجاه المعاكس، والشمال هو اللى ماشى وزحمة كمان والناس اللى فى الاتجاه الصح هما اللى بياخدوا على قفاهم.. - ملعون أبوهم يا مصر لما يفتكروكى عزبة ونهيبة عايزين يتاجروا بيكى وفيكى وانتى ساكتة ومستسلمة وتقولى مش مهم دول مهما كان ولادى ومحدش بهدلك قد ولادك.. - ملعون أبو الحكومة اللى بتخاف وساكتة على الإخوان الإرهابيين القتلة لما كل يوم يقتلوا ويدبحوا علنا أى حد معارض لهم.. - ملعون أبو الناس اللى حولوا حياتنا لغابة كلها تعالب وتعابين وعقارب والأخ بيبيع أخوه ومش بعيد يقتله. - ملعون أبو كل شخص اتحول من بنى آدم إلى حيوان.. ملعون أبو كل شىء يخلينا نتغير للأسوأ واحنا إصلا مش ناقصين. - ملعون أبو المجتمع المنفصم فى شخصيته.. من الآخر: ملعون أبو الواقع.