فيه سؤال كتير بنسأله وكل يوم بنهوله وساعات كتيرة نقصره وكمان ساعات نطوله بيقولوه فى الإعلانات وف جميع المسلسلات خايف كمان فى الراديوهات ليعيدوه من أوله عارفين سؤالنا هو إيه؟ سؤال بسيط وسؤال رزين بيقولوا رايحة على فين؟! طبعاً عرفتوا هى مين هى السنين هى الدوا للموجوعين هى الحنين لولادها المتغربين هى اللى واقفة لوحدها هنا من سنين مليون عميل بيهدها وولادها اللى فى بطنها سابوا عليها السفاحين حتى الولاد الطيبين راحوا فى وسط المجرمين يدورا على عزها بيدوروا على مجدها وهى واقفة وحدها تصرخ عليهم الحقونى يا مؤمنين بتصرخى وهاتصرخى لكن بقولك وقفى صوتك يكون للموجودين أصلاً ولادك هما فين؟ دول مش ولادك دول ناس أكيد مستنسخين عمرك سمعتى عن ولادك أنهم متسولين أو مجرمين أو حتى كانوا بيقتلوا أو يسرقوا ويثبتوا أخواتهم الطيبين عمرك سمعتى عن بناتك أنهم بقوا مجروحين أو حتى لما يحضنوكى تكون عيونهم مليانين جرح وألم من حد باس أو مسك حاجة مش بتاعته من الدماغ حتى القدم متعريين وكمان يسموا اللى بيعملوا كده متحرشين!! لا دول مجرمين فين الرجولة والشهامة دول غابوا عنا من سنين ونسينا طينا وأرضنا وبقينا إحنا لوحدنا بنمد أيدنا لناس بنا متربصين قولى لولادك ارجعوا على الطريق اتجمعوا مسلم مسيحى مش مهم إحنا مين ليبرالى إخوانى وسلفى مش طبيعى نكون كده متحزبين سيبوا الأسامى لوحدها وروحوا تانى لحضنها فين الرجال المخلصين ده أنا أمكم أوعوا تسيبوا أرضكم للعصابة المجرمين ساكتة عليهم من سنين عمالة بتنزف من جدودكوا الأولين مش عارفة إمتى هيعرفوا أن التاريخ هو الدليل على مصير المجرمين وأن اللى سرقوا قبلهم بأيد ولادى المخلصين بقوا فى عداد المفقودين يمكن أكون بضعف كتير لكن هاقوم أورى كل العالمين إن حضارتى من سنين ما هى دى الحقيقة ولا نسيتوا يا محدثين حضارتى كانت بالعقول النيرة مش بالمعيز أو بالبغال ولا بالمعادن والسولار اللى أكيد هيجى يوم وهيخلصوا زى اللى كانوا قبلهم هنا موجودين وترجع حضارتى بالعقول نبنى بها كل الأصول ونرمم المشروخ ما بينا من سنين نمسح دموع المهزومين والمحتاجين والمحرومين ونرجع الدم اللى سال على النواصى م العيال الميتين وناخد بأيد أم الشهيد وبأيد عروسة تبكى على حالها إللى مال ده عريسها مات قبل عيالها المولودين وتقولهم ده أبوكوا حب أرضها وم العدا صان عرضها من تعالب مكارين وارجع لكم بصورة حلوة فى وسطكم متجمعين يمكن أكون جاوبتكم على سوال هنا منكم بتسألوه قوى عندكم هو أنا رايحة على فين؟! هو أنا رايحة على فين؟!
