سنين بتعدي وسنين بتجري من الألفية الأولي وحتي الألفية اللي إحنا عايشين فيها، وحتي الثانية اللي بتقرأوا فيها الكلام اللي أنا كاتباه ده، والولاد بتخدع وتلعب بمشاعر البنات. يااااه! زمن طويل ومفيش حاجة بتتغير من أيام أفلام زمان، و طبعاً من أشهرها فيلم "دعاء الكروان" اللي أخذنا منه أشهر جملة تمثل معاناه البنت المخدوعة في حبها "هنادي راحت في الوبا"، وفضلت سيدة الشاشة العربية فاتن حمامة أو "آمنة " يا عيني توجع في قلبها طول الفيلم علشان تثبت إن العيب مش في البنت لوحدها، وإن ممكن أي رجل يخدعها بالكلام الجميل، حتي إنه في آخر الفيلم وقعت في حب البشمهندش اللي كانت نفسها في أول الفيلم تحطل له سم. وطبعاً مش ده الفيلم الوحيد اللي كان له هدفين؛ إنه يحذر البنت من الوقوع في الخطأ ويحذر الرجل من أنه يخدع البنت، كان في أفلام كتير، ولحد اللحظة اللي إحنا فيها دي في مسلسلات وأفلام بيكتب فيها جزء كبير من السيناريو عن قصص الحب الفاشلة اللي لازم تكون فيها البنت مخدوعة وبتتفاجأ إنه وقت الجد مش عايز جواز. طيب بعد كل ده ليه البنات مش بتتعلم؟! ليه مش عايزة تفهم إنه في فرق بين إنه بيقول لها دي فترة تعارف وبين إن دي سنين بتعدي من عمرهم؟! ليه ميبقاش في صراحة في العلاقة من الأول؟! والسؤال الأهم من كل ده.. هي الرجالة والشباب اللي بيعملوا كده مازهقوش؟! ده حتي الموضوع بقي موضة قديمة. آه والله، ليه الرجالة ماتحطش نفسها مكان البنت وتحس بالجرح العميق قوي اللي بتعمله في قلبها لما يعشمها بعلاقة مش عارف نهايتها، وممكن يكون عارف بس هقول نفس الجملة الشهيرة "بيتسلي لحد لما ماما تجيب له عروسة مؤدبة ماعرفتش حد قبله!". خلاص بقي.. كفاية.. لو احكي لكم عن كمية الوجع اللي بشوفه في بوستات البنات علي مواقع التواصل الاجتماعي، حاجة تحزن إن بعد قمة التكنولوچيا اللي بقينا بتستخدمها في حياتنا كل يوم نلاقي الولاد لسه بتكذب علي البنات وتعشمها. غيروا من نفسكم واعملوا وقفة كدة واسألوا مخكم سؤال واحد "هل نفعكم الكذب في العلاقات العاطفية؟!". يعني مثلاً بقي معاكوا فلوس كتير؟ خلصتوا كل المشاكل في حياتكم؟ نجحتوا نجاح باهر في شغلكم، جامعتكم، أبحاثكم ومشاريعكم؟! الإجابة طبعاً هي لأ، طيب ما نغير علشان نتغير للأحسن اعرف البنت وخليها أختك، ولو حسّيت بمشاعر من ناحيتها عرفها وعرف أهلك وأهلها، وماتخفوش، أهلها مش هيقفشوا لأن زي ما قلنا فوق الزمن اتغير، بالعكس هتكبر في نظرهم حتي لو العلاقة ماكملتش بلاش تكذبوا بلاش تعشموا بلاش تدوا لنفسكم حق الخداع باسم الرجولة وفي الآخر أتمني لكم لقب رجل وزوج محترم أفضل بكتير من ال EX ريهام عادل رشدي