نعى الفنان والمنتج محمد محمود عبدالعزيز، والده الفنان محمود عبدالعزيز في ذكرى وفاته الأولى. وكتب محمد، عبر حسابه الشخصي على "إنستجرام": "فاتت سنة، وطول السنة وأنا بفتكر وبكتب وأنفذ كل حاجة حضرتك علمتها لينا، علمتني كل حاجة ولسه بتعلم من حضرتك حاجات كتير". وأضاف: "علمتني إزاي أبقى راجل وليا كلمة، علمتني إزاي اعتمد على نفسي وماستناش حاجة من حد، علمتني في عز الأزمة أقول يا رب، وعلمتني إزاي أساعد أي حد محتاج من غير ما أجرحه، علمتني إن مش كل حاجة تتحكي حتى لو كانت حاجة كويسة، علمتني إني لما أعمل حاجة خير ولوجه الله أعملها في السر، علشان ربنا يتقبل ويبارك". وتابع: "ربنا يعلم إني بحاول أعمل كل اللي حضرتك علمتهولي، وأتمنى تكون الهدايا بتاعتي بتوصل لحضرتك، ومفرحاك ومريحاك، وفيداك، كلمة واحشني كنت بقولها لحضرتك وإنت معايا وقدام عيني دلوقتي بقت أكبر مشاكلي إن حضرتك مش معايا، وكلمة واحشني مابقلهاش معنى، ومش لاقي لإحساسي تفسير، ولا اسم". واختتم محمد تدوينته: "علمتني كل حاجة إلا انك ماتوحشنيش، الحمد لله على كل حال، اللهم لا اعتراض، ورضيت بقضاء الله، أسألكم الفاتحة لأبويا، ولكل من رحلوا عنا".