طبعًا إحنا داخلين على موسم إجازات بعد فترة الامتحانات، وبالنسبة للي شغالين هيكون وقت المصايف اللي أغلب الشباب بيسافروا فيه، هذا المقال ما هو إلا محاولة لتشجيع كل المصريين لاكتشاف كنوز مصر التي لا يعرفونها. وهنا هقولك إزاي تسافر دهب بأقل مصاريف ممكنة، فيه مبدأ لازم نتّفق عليه، بما أنك مسافر بميزانية قليلة إبعد عن مظاهر الترف وجو شرم خالص. أول وأهم حاجة هنتكلم عليها هي المواصلات تذكرة السفر "ودي رايح جاي من الترجمان أو العباسية أو ألماظة" ب200 جنيه". أول لما توصل دهب هتلاقي فى المحطة تاكسيات على هيئة عربيات نص نقل هتوصلك للمدينة والفندق اللي أنت رايحه، متدفعش أكثر من 5 جنيه للفرد وكمان 5 وأنت راجع، داخل المدينة مش هتحتاج مواصلات في حاجة، لكن هتحتاجها في الرحلات الداخلية والأنشطة اللي هتعملها. أما ثاني حاجة هتكون السكن، "زي ما اتفقنا بلاش رفاهية زيادة" هتلاقي مجموعة فنادق سعر الغرفة فيها من 30 جنيهًا وحتى 150 للأسعار الرخيصة، وكل فئة حسب إمكانيات الغرفة والفطار، وافتكر إن فائدة الغرفة الوحيدة إنك هتنام فيها بالليل وفّر يعني، وطبعًا لأصحاب المستويات العالية موجودة لحد سعر الغرفة أم 700 جنيه فى اليوم، لأشهر الفنادق ال7 نجوم الموجودة. بعد السكن والمواصلات محتاجين نتكلم عن ممكن تعمل إيه فى دهب من أنشطة. بالنسبة للفسح، أجمل مكان لازم تروحه في دهب منطقة اسمها "البلو هول"، هتدفع ما بين 25 - 50 جنيهًا حسب أدوات "السنكرلينج" اللي هتأجرها، وهتروح بجمل ولا عربية وكمان هتلاقي مناطق كتير مش هتصدق من جمالها أنها في مصر، زي "محمية أبوجلوم"، و"الثري بولز"، و"الكيفز"، و"جبل موسى"، و"دير سانت كاترين"، و"الكالور كانيون". خد بالك أنا مجبتش سيرة الغطس علشان لو عايز تغطس تكلفة الغطسة هناك في حدود 250 جنيهًا. الشيء اللي منقدرش نستغنى عنه "الأكل" بالنسبة للأكل تقريبًا نفس أسعار القاهرة في كل حاجة يعني ممكن تجيب أكله تشبعك ب35 جنيهًا، فيها ربع فرخة وشوربة وأرز وسلطة وعيش، وزود بفلوسك بقى في حالات الرفاهية السمك والذي منه. شوية حاجات عامة عن دهب أنت ممكن تعمل الولا حاجة، يعني تصحى الصبح تروح تقعد قدام البحر وترجع تنام علشان تصحى تاني يوم تعمل نفس الحاجة، وهتبقى قمة السعادة والراحة. جنوبسيناء أمان يعني أنا مرة نمت على البحر، وجنبي "اللابتوب" بتاعي وصحيت وهو في مكانه بس ده بردو ميمنعش إنك تحرص عشان لو في ناس غريبة. متنساش وأنت مسافر تاخد معاك أي إسبري بيترش على الجلد عشان الناموس هناك جبار، ده غير نضارة شمس، وكريمات tan للبنات. الهدايا هناك في الممشى رخيصة ممكن تشتري هدايا بردو وأنت راجع في حدود 50 جنيهًا عشان نوعًا ما تحاول تساعد وتنعش الحركة الاقتصادية لأصحاب المحلات هناك اللي جزء كبير منها قفل بسب الصعوبات بتاعت المرحلة اللي فاتت. افتكر آخر حاجة بقى إنك هتلاقي في دهب "جنة ربنا على الأرض"، أوعى تكسّل وتقول المشوار بعيد. انتظروا المكان اللي جاي اللي ممكن تسافر له بأسعار رخيصة.