انتقد الاعلامي محمود سعد، اهتمام مؤسسة الرئاسة بالمحبوسين المصريين في دولة الإمارت الذين ينتمون للإخوان، رغم وجود 350 موقوفا مصريا بتهم مختلفة لم يتطرق إليها الوفد المصري الرئاسي. وقال سعد في برنامجه "آخر النهار" على فضائية "النهار"، "وفي الآخر الاخوان يلوموا علينا ويقولوا إننا بنقول احنا وهما، لا ده انتوا كده اللي بتقولوا، طيب محدش سأل على أحمد الجيزاوي في السعودية وغيره". وأضاف "نحن لا نغضب من الإمارت ولا السعودية، دي حدودهم وحقوقهم الشرعية. لكن نغضب من رجالتنا، وحكامنا". وانتقد سعد، مهاجمة الرئاسة للإعلاميين بقوله "بدل ما تهاجموا الإعلاميين كل شوية، عشان ترهبونا، احنا قلبنا على البلد كلها ومشكلتنا مع قرارات الرئيس وليس مع الرئيس، يعني لما نلاقي الرئيس يبعت وفد رفيع المستوى عشان خاطر 11 إخواني ويسيب بقية المصريين هل نقف نتفرج ده احنا نروح جهنم كلنا لو سكتنا، ده بشرع الرئيس اللي طالب بتقويمه لو أساء، ولما نلاقي قانون زي قانون التظاهر، نقف نتفرج، احنا مش هنعمل كدة، ومستعدين للسجن، والقضايا اللي مرفوعة ضد الصحفيين والاعلاميين مطلوب منها أن باسم يوسف وغيره يكش، لا مش هنكش ومش هنخاف". وتساءل سعد، متعجبا "بذمة النبي فيه دين يقول كدة؟ أي دين يقول إننا ندور على 11 إخواني في الامارات ونسيب المصريين كلهم في الخارج يروحوا في 60 داهية؟، لازم نفكر 100 مرة في أي مسؤول بيتكلم بأسم الدين، وتصرفاتهم كلها ملهاش علاقة بالدين".