يدخل الأستاذ عبد الحميد القهوة فيجد صديق عمره الأستاذ حسن جالسا على منضدتهم المعتادة فى ركن القهوة وهو يتصفح الجرائد أمامه.. يتجه الأستاذ عبدالحميد نحوه ثم يسحب كرسياً ويجلس إلى جواره: -إيه يا حسن مالك؟ منكب قوى عالجرايد كده ليه؟.. -يا أخى الموضوع بتاع البرادعى ده كان عاجبنى.. بس... فكرك يكمل للآخر؟ -لا.. صعب.. بس برضه هو عمل حركة كان لابد منها. -على رأيك.. والمفروض ان كل واحد شايف فى نفسه القدرة يتقدم ويرشح نفسه.. ما ينفعش نقف نتفرج ع الراجل كده ونسقف. -يعنى إنت عايزنا نعمل إيه؟ -يعنى مثلا، ليه يا عبدالحميد ما ترشحش نفسك لرئاسة الجمهورية؟ يذهل الأستاذ عبدالحميد: -....أنا؟ ده أنا كنت لسه هأبدأ أدور لى على شغلانة بعد المعاش!! وبعدين إنت عايزنى أرشح نفسى بأمارة إيه؟ -يعنى هم اللى رشحوا نفسهم داكى النهار كان بأمارة إيه؟ -لأ الوضع مختلف.. دول ناس فى السياسة من زمان والناس عارفينهم إنما أنا يادوب إنتوا بس اللى تعرفونى عشان عايش وسطيكم. -طب ما هى دى!.. شوف يا عبدالحميد مش هينفع يحكم البلد دى غير واحد مننا..عايش وسطينا وحاسس بينا بياكل أكلنا وجيبه مهوى زينا.. إنما البهوات اللى بيتكلموا فى الجرايد دول عايزينها عشان المنظرة.. ثم هو انت يعنى هتخسر إيه لو رشحت نفسك؟ أنت وراك حاجة تانية؟ -ما أنا لو انشغلت بموضوع الترشيح ده مش هألاقى وقت أدور عالشغلة اللى باقولك عليها، إنت عارف المعاش وحوجته.. -يا سيدى إبقى لف ع الناخبين الصبح ودور ع الوظيفة بعد الظهر. -طب ما ألف ع الناخبين خميس وجمعة وأدور ع الوظيفة بقية الأسبوع.. -أقولك.. إحنا نبقى نلف معاك عالناخبين وانت فى النص إبقى كت لك ساعة واللا اتنين دور فيهم على شغل ونبقى مع بعض على موبايلات بقى.. وهنا يدخل عليهم مرزوق صبى القهوة وفى يديه صينية محملة بأكواب الشربات فيبادره حسن متعجبا: -احنا ما طلبناش الحاجات دى! -يا بيه دى تحية من المعلم وهدان صاحب القهوة. فينظر عبدالحميد وحسن فى اتجاه وهدان الذى ينهض من مكانه متوجها إليهم مهللا ومرحبا: -يا أهلا يا أهلا بالباشا رئيس الجمهورية. فيجيبه عبدالحميد متعجبا: إيه ده؟ هى لحقت وصلت لك؟ وهدان: أمال يا باشا.. ده أنا مش مصدق نفسى أن القهوة بتاعتى بتشهد اللحظات التاريخية دى.. عارف معاليك يا أستاذ عبدالحميد.. حسن مقاطعا: فخامتك يا معلم.. وهدان: آسف آسف.. فخامتك.. عارف فخامتك لو كان البرادعى بدأ الحملة بتاعته من القهوة هنا كان زمان ربنا كرمه وحاجته قضيت.. إنما انت كده باديها صح وإن شاء الله نبارك لمعال.. أقصد لفخامتك قريب.. عبدالحميد وقد بدأ يصدق: إن شاء الله.. إن شاء الله وهدان: وبالمناسبة دى أنا بعت أجيب فرقة سكسكة من الشارع اللى ورانا تحية صغيرة كده لفخامة الريس وحبايبه. عبدالحميد مبتسما فى خجل لا يخلو من بوادر عظمة: والله مالوش لزوم الكلام ده. وفجأة تنطلق عند مدخل القهوة أصوات موسيقى نحاسية وأبواق وإذا بالفرقة التى أوصى عليها وهدان قد أتت فانتفض دقدق واقفا يلوح بورقة نقود فى الهواء ليحيى الضيوف وأخذ يصيح: «التغيير» فصاح خلفه سكسكة: «التغيير».. فصاح دقدق: «كمان مرة التغيير»، فرد عليه سكسكة: «كمان مرة التغيير».. فاندفع وهدان ليحيى الضيوف هو الآخر: «الدستور».. فرد سكسكة: «الدستور».. فصاح وهدان: «كمان مرة الدستور».. فرد سكسكة: «كمان مرة الدستور».. فصاح دقدق: واللى يحبنا مايكتمش على نفسنا وسمعنى سلام والنبى لنكيد العزال.. من كتابى تحت الطبع: «قوم يا مصرى.. واقعد تانى»
