أحد المعلمين: «الوزير معهوش عصا سحرية.. اصبروا شويه عليه» إحدى المعلمات: «لما يتوافر الجو الملائم داخل المدارس الأول.. يبقى يوزع التابلت على التلاميذ» تداول نشطاء على موقع التواصل الاجتماعي «فيس بوك»، صورة لمدرسة أولاد الشيخ عبد الزين بالمثاني، بإدارة النجيلة التعليمية بمحافظة مطروح، والتي أظهرت جلوس الطلبة على الأرض لعدم توافر أماكن مخصصة لهم . وأثارت الصورة جدلاً بين أوساط المعلمين في صفحاتهم على «فيس بوك»ما بين معارضين لما وصفوه بإهمال وزير التربية والتعليم الدكتور محمود أبو النصر، وبين آخرين يؤكدون «أن الوزير ليس لديه عصا سحرية»، على حد وصفهم. وقال أحد المعلمين «ديه هدية رائعة إلى وزير التعليم، بمناسبة الخطة الإستراتيجية 2030، و توزيع التابلت على المدارس الحدودية، إحنا آسفين إننا بنزعج سيادة الوزير بالصورة ديه». ووافقته الرأي إحدى المعلمات، قائلة «مفيش مشكلة إننا نتطور التعليم فعلا ونخلي أولادنا يتعاملوا مع التابلت، بس لما الأول نقدر نكفي عدد التلاميذ داخل كل مدرسة، ونوفر لهم جو ملائم لتلقي التعليم، نبقى نديهم التابلت ونعلمهم عليه، احنا محتاجين حاجات كتير في التعليم». واختلف معهم في الرأي أحد المعلمين، قائلاً «اصبروا شوية على الوزير، أكيد معهوش عصا سحرية، الوزير ده شغال كويس وبيعمل اللي عليه، ومش هيصلح كل حاجة فجأة، ساعدوا عشان ننهض بالتعليم، ده لو يهمكم التعليم، مش كشف الخراب وبس». وعلق على كلامه آخر، قائلاً «المفروض لما نشوف حاجة غلط، نسكت ونطبل للوزير، ولا نقول إن ده غلط، التلاميذ والمعلمين بيستغيثوا في المناطق الحدودية، سواء من المدارس اللي محتاجة صيانة، أو عدد التلاميذ أكثر من المقاعد، ولّا خوفًا من التفجيرات، زي ما بيحصل في سيناء». يذكر أن الدكتور محمود أبو النصر، وزير التربية والتعليم، قام بتوزيع ال«تابلت»على المدارس في المحافظات الحدودية، مؤكدًا أنه ساعد في رفع نسبة حضور الطلاب للمدارس بنسبة 99% في هذه المحافظات.