القرموطي في «مانشيت»: بيقولو إننا بناخد فلوس من الجيش، أنت ياد مش بتاخد فلوس؟!.. إيه يعني لما نمسك في الجيش استنكر الإعلامي جابر القرموطي ادعاءات أنصار جماعة الإخوان باغتيال الفريق أول عبد الفتاح السيسي في أكتوبر الماضي، والزعم بأن الموجود حالياً هو شبيه له، معتبرا أن نشر أخبار مغلوطة باغتيال قائد الجيش غرضها صنع "خلخلة معنوية في قيادة الجيش"، حسب قوله. وقال القرموطي في حلقته اليوم ببرنامج مانشيت على قناة أون تي في: الإخوان بتشير بكل قوة على فيس وتويتر إن أحمد الشرقاوي مكسر الدنيا علشان قال عبد الفتاح السيسي تم اغتياله في 17 أكتوبر 2013". وتساءل: "أنت صحفي مهني؟!، بلاش، أنت مصري؟!"، وأضاف ممسكاً ببعض التراب في يده "أنت شفت مرة التراب بتاع البلد؟!، جايبينلك شوية تراب أهه، أنت مشيت على دول، وطأت قدماك هذا التراب، أنت حسيت بده قبل كده". وتابع: "اختلف وقول إننا وحشين وقول إن البلد وحشة، إحنا مش عبيد البيادة، إحنا عبيد التراب اللي بتمشي عليه البيادة، إيه رأيك في الحتة دي"، واستطرد حاملاً التراب بين يديه " إحنا بنحب التراب ده اللي بتمشي عليه البيادة، ده تراب البلد والله، جايبينه من مدينة الإنتاج الإعلامي، يعني إتيكيت" . وأردف "بنقول للي بره إن التراب ده اللي البيادة وجزم المصريين وكل رجل مصرية مشيوا عليه بنحبه، ومش هنتنازل عن صيانة التراب ده بغض النظر عن اللي موجود". واستطرد: "يقولك انتو بتقولوا كلام ملهوش لازمة علشان انتم في القنوات وبتقبضوا بالدولارات والملايين وماسكين في الجيش، طب إيه يعني لما نمسك في الجيش، يقولك لا أصل الجيش عنده مشاريع وبيديكم فلوس، وكل ما تيجي تتكلم عن حاجة يقولك أصلكم بتاخدوا فلوس منهم". وواصل " أنت ياد مبتاخدش فلوس؟، أنت قاعد بره بتعمل إيه؟، تهين بلدك يلا، على رأي الأستاذ عكاشة قائد الجيش بتاعك تروح تقول عليه تم اغتياله عشان تعمل خلخلة معنوية في قيادة الجيش". واستكمل " ليه؟!، أنت معندكش عقل، انتقد وقول وشاور وخاصم وأفجر زي ما أنت عايز، لكن توصل الدرجة إنك تروح تقول الكلام ده في القناة العميلة، ولما ترجع بلدك هيبقى شكلك إيه". Video of جابر القرموطي: احنا بنعشق التراب اللى بتمشي عليه البيادة
