دعت صفحة "كلنا خالد سعيد" كل المصريين بمختلف افكارهم وانتمائاتهم بغض النظر عن اختياراتهم فى انتخابات الرئاسة الى التوحد حول تحقيق مطالب الثورة ، وجاء خطاب الصفحة كالتالى : الشعب خلاص اختار الرئيس! خطوة جديدة في طريق طويل نحو الحُريّة .. أغلب أعضاء صفحتنا اتولدوا وحسني مبارك هو رئيس مصر .. كل علاقتنا بالانتخابات كانت استفتاءات مبارك اللي بيكسبها بفوق ال 90% .. مبارك مكانش مجرد رئيس، مبارك كان اسم شارع وجامعة ومدرسة ومستشفى ومعهد ومدينة وصورة في كل مؤسسة حكومية! .. أغلبنا بعد ما شاف ديكتاتور تونس بيسقط سأل نفسه هو بجد ينفع يبقى عندنا رئيس انتخبه المصريين؟ .. نزلنا وناسيين أي اختلافات بيننا وكان هدفنا واحد .. كنا عايزين حقوقنا ومش هنمشي إلا لما ناخدها .. كانت فكرة مستحيلة .. محدش فينا ينكر إنه مهما كان فيه تحديات واجهناها ولسه هنواجهها .. مجرد تخيّل مشهد النهاردة كان صعب أوي يوم 25 يناير .. النهاردة يوم انتصار جديد من انتصارات الثورة لأسباب كتيرة: أولا: أغلبنا نزل يُسقط مرشح اعتبر مبارك مثله الأعلى وهاجم الثورة والثوار واعتبر إن ده طريقه للانتصار فخسر ثانيا: لأول مرة في تاريخ مصر الشعب هو اللي يختار رئيسه بإرادته وصوته الحر بعيدا عن الصناديق المتقفلة بأصوات الأموات ثالثا: رئيس مصر اتبهدل في كل وسائل الإعلام إنترنت وفضائيات وصحف عشان يكلم الناس عن برنامجه وأفكاره .. الرئيس واحد مننا. مش فرعون بعد الثورة بيحكمنا عشان "الشعب عايز كده" مش عشان "النظام عايز كده" رابعا: الرئيس ده برغم معاناته طول الانتخابات مأخدتش في الجولة الأولى غير ثقة 25% من الشعب خامسا: إننا دفنا فكرة التسعين في المائة تأييد .. رئيس مصر الجديد أيده 52% من الشعب وعارضه 48% من الشعب سادسا: الرئيس دلوقتي هيبقى موظف عام عليه إنه يلتزم بتعهداته أمام الثورة وكلنا هنحاسبه بمجرد استلامه السلطة سابعا: الشعب بكل طوائفه بيشاركوا في الحياة السياسية وبيقولوا رأيهم وبيقبلوا وبيرفضوا وبيختاروا اللي هما عايزينه سواء عاجبنا اختيارهم أو مش عاجبنا احنا جيل شاف ميدان إسمه التحرير .. وشاف ديكتاتور بيسقط .. وشاف انتخابات نزيهة .. وكسر حاجز الخوف .. احنا جيل لسه المستقبل بتاعه أكبر من أي ماضي .. والأحلام عنده أقوى من أي كوابيس .. والعزيمة عنده أكبر من أي يأس .. ده مش نهاية المطاف ومش هيكون أول ولا آخر انتصار معنوي وحقيقي للثورة ومش هيكون برضه أول أو آخر تحدي للثورة .. إحنا مكملين ولسه الطريق صعب وطويل .. ومطالبنا هنحققها بجهدنا وعملنا المتواصل واتحادنا.. سواء انتخبت مرسي أو انتخبت شفيق أو قاطعت الانتخابات .. كلنا مصريين .. ودلوقتي جه دور إننا نكمل مطالب الثورة الحقيقية اللي ميختلفش عليها أي مصري نفسه يشوف بلده أحسن .. عيش .. حرية .. كرامة إنسانيّة عدالة اجتماعية .. يا ريت كلنا نفتكر إن كل لحظة بنعيشها من 25 يناير لحد النهاردة كانت بسبب مصري أو مصرية ضحّوا بحياتهم أو أصيبوا أو بذلوا وقتهم عشان كان نفسهم يشوفوا بلدهم أحسن .. فادعوا للشهداء بالرحمة وللمصابين بالشفاء ولباقي الثوار بالأجر والمثوبة وجاهدوا عشان أحلامهم تتحقق .. احنا مكمّلين والثورة هتنتصر بينا ان شاء الله :) - كلنا خالد سعيد