كشف المخرج محمد سامي أنه انزعج عندما علم بوجود مسلسل يحمل اسم "حضرة العمدة" في نفس الوقت الذي يقدم فيه مسلسل "العمدة" برمضان 2023. وقال محمد سامي خلال لقائه في برنامج "الراديو بيضحك" من تقديم فاطمة مصطفى عبر إذاعة "الراديو 9090": "حضرة العمدة" إنتاج ريمون مقار ومحمد محمود عبد العزيز وهما أصحابي وبحبهم أوي لما عرفت أن المسلسل اسمه "حضرة العمدة" مكنتش مبسوط وكان في مكالمة بيني وبين الدكتور خالد عبد الجليل رئيس الرقابة على المصنفات الفنية، وقتها لكن مرضتش أدخل في نقاش لأن روبي أختي وهي ومراتي أصحاب ومش هينفع أخليها تزعل ولا ريمون ولا محمد سواء عشانه أو عشان كريم أو والده الفنان الراحل محمود عبد العزيز، وأستاذ إبراهيم عيسى ليه احترامه أنا معرفوش مقابلتوش شخصيا ولكن ليه احترامه هو إعلامي ومؤلف مهم. وتابع: مكنتش مبسوط أكيد لأن في مسلسل اسمه "العمدة" وهنعمل مسلسل اسمه "حضرة العمدة" وممكن يحصل تشتيت، لكن في حالة من الغرور عندي إحساسي بذاتي بعد توفيق ربنا باقول يارب كل الناس تنجح بس كحالة من الغرور هيبقى مسلسلي "العمدة" هيكون ليه "هوية" والناس هتتعلق بيه. وأوضح محمد سامي أن اسم مسلسله هو "جعفر العمدة" وليس "العمدة" وقال: المسلسل اسمه "جعفر العمدة" الناس طول الوقت بتقول العمدة لكن هو المسلسل اسمه "جعفر العمدة" وفي الآخر أتمنى كل المسلسلات تنجح لأن دا بيخلي الموسم قوي، لو أنا عامل مسلسل حلو وباقي المسلسلات مش قوية هبقى الأول جايب 80% لكن لو الناس جايبين 90% و 100 % بيبقى شكل التميز حلو، إحنا مطلوب مننا نسلي الجمهور نقدم ليه حاجة حلوة، أنا بدأت شغل وكان في 70 مسلسل في رمضان وقت "آدم" وكنت لسه عيل صغير وعرفت أنجح وسط الناس بدعمهم، الموضوع ممتع لما بيكون في عدد كبير، ممتع لما بيبقى كل الناس شغاله مش بيبقى في ناس كتير بتتكلم، مصر تستاهل أن يبقى الموسم فيه 200 مسلسل. وأضاف مازحا إحنا 110 مليون لو افترضنا أن 80 مليون بيتفرجوا على المسلسلات لو قسمنا أن في 100 مسلسل في مصر 99 مسلسل بيتفرج عليهم مليون مسلسلي بيتفرج عليه 79 مليون هيبقى في عدل. ويواصل محمد رمضان تصوير مسلسل "العمدة" الذي من المقرر عرضه في رمضان 2023. وتدور أحداث مسلسل "العمدة" في حي السيدة زينب، ويلعب محمد رمضان شخصية "جعفر العمدة"، المتزوج من أكثر من سيدة، ويعاني من ألم شديد بسبب اختطاف ابنه منذ 20 عاما، ونتابع رحلة بحثه عن ابنه للتأكد من وجوده على قيد الحياة، ومن جهة أخرى يقنع "جعفر العمدة" زوجته بوفاة ابنه، ويصحبها لقبر فارغ لقراءة الفاتحة على روحه. ومسلسل "العمدة" تأليف وإخراج محمد سامى وشارك فى السيناريو والحوار مهاب طارق وإنتاج شركة ميديا هب سعدى - جوهر، وبطولة محمد رمضان، زينة، إيمان العاصى، هالة صدقى، مى كساب، أحمد داش، منة فضالى، هيدى كريم، فريدة سيف النصر، تامر عبد المنعم، طارق الدسوقى، وعدد آخر من الفنانين، وتدور الأحداث فى إطار اجتماعى شعبى.
