كشف المطرب على الحجار، خلال مداخلة هاتفية مع الاعلامية سهير جودة ببرنامج «الستات» عبر قناة «النهار»، تفاصيل خلافه مع المطرب مدحت صالح، بشأن مشروع الأخير الغنائي، الذي يطلق عليه «الأساتذة»، والذي يعتبره الحجار مأخوذا من مشروعه الذي يعكف على تحضيراته منذ عام 2002 ويحمل اسم "100 سنة غنا". مدحت صالح وعلى الحجار
الحجار يكشف تفاصيل خلافه مع مدحت صالح
علق الحجار على إمكانية صلح مع مدحت صالح، قائلا: مدحت صالح بالنسبة لي فنان كبير ومهم وأنا بحب منه أغاني كتير.. لكن فكرة 100 سنة غنا بتاعتي وهو عارف.. وهو بيطلع في برامج كتير بيقول علي الحجار أستاذي.. لدرجة إن في مرة منى الشاذلي بتقولي تحب يطلع مدحت صالح معاك.. قولتلها آه طبعًا.. وطلعنا وقال قدام كل الناس إنه كان بيقعد ورا السور عشان يتعلم مني وإني أستاذه".
على الحجار
على الحجار يفتح النار على مدحت صالح
وأضاف علي الحجار: مدحت عارف مشروعي وعارف إن الدراسة اللي عملتها هو ناقله بالظبط.. وطلعت في مرة قولت ده مع هالة سرحان.. واخد المشروع كوبي بيست.. ومن وجهة نظري المؤلف والملحن هما صانعي الأغنية والمغني هو مؤدي.. ياما مؤدي كويس أو مغني كويس أو مطرب.. لما الدولة تهتم وتعرف إنه مشروع مهم.. بأرخ من سنة 19.. ده مشروع قومي.. احنا مش اتنين عيال صغيرة في الشارع واتخانقنا مع بعض..وبتصالحونا مع بعض.. الموضوع مش كده".
وأضاف: "مدحت صالح من أول ما طلع بيغني لنفسه 5 أو 6 أغاني.. والباقي أغاني لمؤلفين وملحنين تانيين دي مش حاجة جديدة.. واللي عمله في الحفلة.. هي حفلته اللي عملها قبل كده.. مفيش جديد.. وقال هطور الأغاني واعمل توزيع معاصر.. ومفيش حاجة حصلت زي ما كان بيعمل طول عمره في حفلاته العادية".
مدحت صالح وعلى الحجار
الحجار ل مدحت صالح: إيه الجبروت بتاعك ده؟
واستكمل الحجار هجومه على مدحت صالح: أنا مسمعتش مدحت صالح بيقول إن المشروع بتاعه وإنه من دماغه.. نفسي يطلع يقول.. واللي حصل امبارح من الوزيرة أرضاني.. إن المشروع بتاعي يتحقق واعرف احققه بالشكل فعلًا الناس تفهم إن ده مشروع وإن دي دراسة ويفيد الدولة بجد. إيه الجبروت بتاعك ده؟.. ولما بعتولي في الحوار الوطني من أسبوعين قولت إن الفنان المصري هو اللي أرخ لحضارة مصر بالمعابد والمسلات اللي كتب عليها.. الفن مش للمتعة بس والفن رسالة..أنا مش عايز اطلع اخد فلوس من الحفلات والرحلات وخلاص.. عندي هدف اسمى وكبير جدًا.. وأنا عيل عندي 22 سنة كنت بختار رباعيات صلاح جاهين.. وكتر خيره بليغ حمدي كان عقدي معاه إني مغنيش لمدة 3 سنين غير له.. ولما لقاني بختار الرباعيات وسيد مكاوي وانتجه على حسابه قد إيه الراجل ده عظيم. على الحجار ومدحت صالح
الحجار: عايز مدحت صالح يطلع يبرا نفسه من إنه أخد مشروعي
واختتم علي الحجار حديثه، قائلًا: عايز مدحت صالح يتحرك ويطلع يتكلم ويبرأ نفسه من إنه أخد مشروعي.. وكلموني وقالولي إنهم كلموا مدحت صالح من أسبوع وبيقول هو علي الحجار ليه مكلمنيش ويقول ليه يا مدحت بتعمل كده؟ يا سلام يعني أنت واخد مشروعي وعايزني كمان أكلمك؟ إيه الجبروت ده؟ هو ديمًا بيقول إن علي الحجار استاذي يكلم استاذه بقى.. ومنتساواش ببعض على فكرة.. محدش عنده 300 أغنية محدش عمل 121 تتر مسلسل.. محدش عمل التنوع بتاعي.. مينفعش نقول انتو الاتنين.. أنا آسف والناس هتفهم ده غرور لكن أنا بتكلم في حقائق.. اللي حصل من الوزيرة امبارح ريحت قلبي جدًا جدًا وطمننتني إن المشروع هيتعمل صح.. اللي حصل قبل كده مكنش مشروع.
مشروع "الأساتذة"
ويذكر ان الفنان مدحت صالح قد قدم مساء يوم الجمعة الماضي حفل "الأساتذة ومدحت صالح"، وشهد الحفل حضور عدد كبير من المسؤولين والنقاد والإعلاميين ومنهم وزيرة الثقافة الدكتورة نيفين الكيلاني، ورئيس دار الأوبرا المصرية الدكتور خالد داغر، وكذلك الناقد الفني طارق الشناوي، والإعلامية جاسمين طه زكي، ويهدف مشروع "الأساتذة" إلى إعادة صياغة التراث الموسيقي المصري والعربي، والانتقال بألحانه من شكل "التخت" التقليدي، إلى الصورة الأوركسترالية الحديثة، دون المساس بالبناء الأساسي للألحان والمقامات.
