اعتادت الإعلامية ياسمين عز تصدرها التريند "جوجل" بعد كل حلقة جديدة من برنامجها الذي يحمل اسم "كلام الناس" على قتاة MBC مصر. وحرصت ياسمين عز، على توجيه رسالة لجمهورها وبالأخص الزوجات للحفاظ على بيوتهن، بعد عرض حلقتها من برنامجها "كلام الناس".
ياسمين عز: ستات كتير بتنسى أن الزواج ميثاق غليط
وقالت: "في ستات كتير بتنسى أن الزواج ميثاق غليط، وكلمة طلقني ماتتقلش على أتفه المشاكل، افهمي جوزك وامتصي غضبه وصوتك يبقى واطي، وماتبعيش ودانك لحد وماتسمحيش لواحدة فشلت في حياتها الزوجية تعمل لك غسيل مخ".
ياسمين عز: الست مش بتنور بعد الطلاق
وتابعت ياسمين عز: "الست مش بتنور بعد الطلاق، الراجل بينور ويطفي لكن الزرار عندك".
ياسمين عز: صاحبتك الحرباية هي اللي بتفضل تقولك اشتمي جوزك
وأضافت: "المشكلة أن نسبة كبيرة من الجيل هيبقوا أبناء طلاق وأغلبهم شافوا الخلافات وقرف بين باباه ومامته"، مضيفة: "صاحبتك اللي بتفضل تقولك اشتميه واخلعيه وأن زيك زيه وراسك براسه هل بتيجي الحرباية دي تقف معاكي وتقف مع عيالك لما يحتاجوا والله ما هتعبرك وهتلف على واحدة غير سعيدة في حياتها".
ياسمين عز: الست بتضلم وتعتم بعد الطلاق ومش بتنور ولا حاجة
واستطردت: "الست بتضلم وتعتم بعد الطلاق ومش بتنور ولا حاجة والنور اللي بجد لما تعيشي حياة طبيبعة بينك وبين جوزك ولا فيلر ولا بوتوكس هيخليكي تنوري لان الراجل هو اللي بينور ويطفي اسألي جوزك ايه مضايقك وامتى تبقى صاحبته وحبيبته".
ياسمين عز: بلاش تبصي لزميلك في الشغل وأحمد ربنا علي جوزك
وقالت: "احمدي ربنا على جوزك وبلاش تبصي لزميلك في الشغل ولا قريب صاحبتك وتقارني بينهم.. الراجل بيحارب طول اليوم بلاش تنكدي عليه وأول ما تشوفيه قوليله ربنا يديمك نعمة في حياتي".
ونصحت السيدات بعدم انتقاد أزواجهن وقالت: "اوعي تنتقدي جوزك قدام أي حد ولا تقولي مميزاته وتسمحي لجارتك أو أي حد في الدنيا إنه ينتقد جوزك جوزك قدام الناس مفيهوش عيوب وكامل وروحي لجوزك وقوليله حبيبي لو عيوبك لو الكل عبهالك أنا أبوسهالك واللي متغاظ مننا يعمل زينا".
واستكملت حديثها قائلة: اللي كانت بتسخنك دي هتبعد عنك وانتي قاعدة فاضية هي بتكلم جوزها والمولد هيتفض وكل واحده هتروح لحضن جوزها وانتي تفضلي تعيطي وتتحسري على حياتك وولادك.
وأضافت: عايزينك تكوني أذكى البنات واسمعي كلام العقل والأصول ومتسمعيش كلام مخرب اللي فشل في حياته عايزك تبقي زيه متسمعيش كلامه وقوليله انا بحب جوزي ووعيالي وخليكي ناصحة وواعية ومتبقيش ودانية وكل راجل ليه واي خناقة مهما كانت بتنتهي بعد نص ساعه كلمة حلوة وكيك. وأختتمت حديثها قائلة: والراجل مفيهوش عيوب واحنا اللي بنقفله على الواحدة، احنا مش في حرب ولو في حرب اخسريها واكسبي جوزك.
