نفسك تروح تشوف محمد صلاح في أرض الملعب، نفسك تشجع ليفربول من مدرجات الأنفيلد، نفسك تغني في المدرجات Mo Salah, Mo Salah. Running down the wing Salah la la la la la la la The Egyptian king، وتقول مع الجماهير لن تسير وحدك ابدًا، متخيل أن الموضوع مستحيل؟ هو الموضوع صعب بس مش مستحيل، كلامنا كله بدون التطرق للفيزا.. هنتكلم إزاي تسافر إلى إنجلترا وتتابع مباراة لنادي ليفربول من مدرجات الأنفيلد.. الطيران هناخد طيارة زي ما اتعودنا في الحلقات اللي فاتت من الغردقة إلى لندن مقابل 3321 جنيه مصري رايح جاي، وبالتحديد في التاريخ من 16 يناير إلى 21 يناير، هنقعد في لندن يوم واحد وبعدها هنروح إلى ليفربول بالقطر ب 50 دولار وده طبقًا لموقع OMIO وممكن نروح بالعربية بس هناخد 11 ساعة في الطريق ودي هتكون ب 28 دولار بس، وطبعًا هنروح بالقطر علشان الراحلة شوية (3 ساعات بس). الإقامة هنقعد زي ما قولنا في لندن ليلة واحدة هندخل على موقع hostelworld وأنا اخترت هوستل اسمه SAFESTAY LONDON ELEPHANT & CASTLE هيبقى سرير في غرفة مزدوجة بتضم 12 سرير مقابل 244 جنيه، ومن يوم 17 إلى 21 هنبقى في مدينة ليفربول، اخترت هوستل اسمه Embassie Liverpool Backpackers، سرير في غرفة فيها 10 سراير رجال فقط ب 485 جنيه في اليوم = 1950 جنيها..
شراء التذاكر إحنا هنا بنعمل مثال للي ممكن تنفذه علشان تقدر تتفرج على ماتش في الأنفيلد، أول حاجة محتاج تعملها علشان تقدر تشتري التذاكر (بدون مجازفة) هو أنك تعمل عضوية لايت هتكلفك 27 جنيه إسترليني يعني ما يُعادل 540 جنيه مصري، وبعدها هتدخل تشوف التذاكر اللي لسة متاحة من هنا، على فكرة ممكن متعملش العضوية الموسمية بس هتنتظر قبل المباراة بيوم واحد بس علشان تستنى التذاكر اللي هتفضل بعد بيعها للأعضاء، وخلي بالك أن فيه مباريات كثيرة اتباعت كلها خلاص، وممكن تشتري تذاكر من الفريق الضيف مش كل التذاكر بتتباع فبكدة تكون حضرت المباراة ولكن في مدرجات الخصوم شهر يناير لسة منزلتش تذاكره بس انا مختار تاريخ السفر ده علشان اولا ارخص طيران للندن في الوقت ده، وثانيا لأن مباراة ليفربول ومانشستر يونايتد هتكون يوم 18 يناير، ممكن يبقى صعب تلاقي التذاكر دي، بس هي بتنزل قبلها بفترة لو قررت انك تسافر ممكن تلحق انك تشتري تذاكر وتظبط حالك وتسافر، وممكن تعمل التجربة دي في أي وقت بالسنة، ثمن التذاكر مش كبير أوي وبرضة هتتراوح من 500 جنيه إلى فوق، وفيه تذكرة ب 9 جنيه إسترليني، واماكن كل تذكرة وسعرها هتلاقوها في الصورة اللي تحت دي.. ومجموع الرحلة دي هتكلفك أقل من 8 آلاف جنيه..
