استنكر الإعلامي عمرو أديب، فرحة وتباهي قناة الجزيرة بفيديو تنظيم داعش الإرهابي حول قنص جنود الجيش المصري، قائلًا: "إيه اللي مفرحكم كده في واحد يقنص واحد". وأضاف "أديب"، خلال تقديمه برنامج "كل يوم"، المذاع على فضائية "on-e"، أنه "للأسف لا يتم عرض ما يفعله الجيش المصري في تنظيم داعش في سيناء"، معقبًا: "للأسف فيه مذيع مصري حاجة عار يعني فرحان باللي عمله داعش في الجنود ويتساءل عن قدرات الجيش المصري طيب متسألش ليه عن قدرات الجيش القطري". وتابع أن قطر ليس لديها حتى فريق كرة قدم يحملون الجنسية القطرية، قائلًا: "إحنا جشينا مش زي جيش قطر اللي مفهوش واحد قطري حتى وكلهم من بره.. وأنا مستغرب المذيع المصري ده اللي بيهاجم جيش بلده.. هو إيه اللي جرى في الدنيا الانصاص قامت والقوالب نامت.. فين حرمة النفس وإنكم ضد الإرهاب أيا كان نوعه"، موجهًا حديثه إلى الشامتين في الجيش المصري من المصريين في قطر: "ربنا هيورينا فيكم يوم". واستطرد أنه احترم رأي المحامي خالد علي وهو أكبر معارض في مصر بسبب تصريحاته الوطنية عن جنود الجيش المصري بعد فيديو داعش، قائلًا: "محدش يقدر يتكلم كلمة وحشة عن أي شهيد وإحنا نوطي نبوس جزمة أي شهيد". وأوضح: "بقى فيه جزء من الإسلام والمسلمين كده إرهابيين ولو الناس المسؤولة معملتش حاجة قولوا على المجتمع ده يا رحمن يا رحيم.. لم يعد هناك مجال للهزار أو الدلع"، مطالبًا المصريين بالقلق يوم السبت المقبل، قائلًا: "أنا السبت القادم يوم القداس قلقان وخليكم قلقانين معايا".
