بما ان الرسالة لينا كمصريين فهكتب بالعامية اسمحولي .. هو احنا ايه اللي حصللنا.. ليه بقينا رخاص كده!! ليه الصحافة المصرية الوحيدة اللي بتتعامل وحش من كل الشخصيات العامة على مستوى الوطن العربي ..
هل ده بسبب ان اي حد بقا صحفي او مذيع او مراسل؟ والا بسبب ان نقابة الصحفيين هي نفسها مرخصة الصحفيين وبتهينهم وليها مصالح تانية؟ والا بسبب ان الإعلام المصري مابقاش قوي ولا ليه ريادة ولا كلام "الأفلام" ده؟ والا بسبب ان بقا في إعلاميين بيروحوا عشان ياكلوا بس او عشان ياخدوا سيلفي مع النجوم؟ والا بسبب ان عشان خبر او حوار بقا الإعلامي بيجري ورا النجم ويتكعبل ويلهث ويتضرب من البودي جاردات وبيفضل يكمل ويجري وراهم؟
الكلام ده مش كلام انشا .. أنت كإعلامي بتقرأ المقال دلوقتي هييجي في دماغك مواقف كتير زي موقف سعد لمجرد.. مواقف اليسا.. موقف شيرين.. معاملة الدير جيست للصحفيين "المصريين" كخدامين.. بودي جاردات المهرجانات.. برامج المواهب.. القنوات وبياناتها..
يا راجل ده حتى الفنانين المصريين بيهينوا الإعلام المصري زي موقف داليا البحيري والبودي جاردات.. ودعوات السينمات..
حد سأل نفسه ليه حصلنا كده وبقينا تحت الأرض.. وهل دي مؤامرة على الإعلام المصري باتفاق من بعض الفنانين (الدوليين ) ل"ترخيصه" وقتل الإعلام في مصر زي ما بيقتلوا الفن بقالهم فترة!
ولو حتى في مؤامرة فاحنا اللي بنساعدهم على كده
في الختام ..
أنت كإعلامي تعالى على نفسك حبه و"غلي" نفسك وخلي كرامتك فوق الخبر والانفراد .. ورسالة لكل الفنانين والقنوات والشخصيات العامة تكاتفوا سوا ورجعوا الريادة المصرية .. مفيهاش حاجة لما تفضل إعلام بلدك عن اي إعلام تاني وتسنده وتديله الأولوية .. إعلامك لو وقع .. بكرة مش هتلاقي اللي يتكلم عنك وهي دي الخطة اللي ناس عاوزينها ..
