أنتقد الشاعر الغنائي أمير طعيمة، الفنان نور الشريف حول حديثه الذى دار بينه وبين المشير عبد الفتاح السيسي، فى لقاء الأخير بالفنانين باعتراض الشريف على رفع الحد الادنى للأجور. حيث كتب طعيمة عبر صفحته الشخصية بموقع التواصل الاجتماعى فيس بوك : الفنان نور الشريف، في لقاء المشير السيسي بالفنانين قال: أنا ضد رفع أي رواتب في الفترة الحالية و انه مع فكرة شد الحزام . يا أستاذ نور الناس اللي بيطالبوا برفع اجورهم ما بيقبضوش 10000 الآف جنيه في الشهر و طمعانين يبقوا15000 ألف، فيه ناس في بلد سيادتك بيقبضوا 200 جنيه و 300 جنيه في الشهر اللي حضرتك و حضرتي بندفعهم في أكلة سمك أو في كام علبة سجاير، مش عيب و لا حرام انك تكون علي مستوي مادي كويس، بس العيب و الحرام انك توافق ان بني آدم زيه زيك و ممكن يكون عند الله أفضل بكثير يعيش بدخل بالشكل ده، تقدر تقولي حضرتك تقدر تعيش ب 300 جنيه كام يوم او ب 500 او 600، الحد الأدنى للأجور اللي الناس بيطالبوا بيه ، و هو 1200 جم أساسا دخل منخفض جدا مقارنة بأي دولة عادية في العالم. وأضاف قائلا : بعدين حزام ايه يا أستاذ نور اللي يشدوه، مش كفاية حزام الجوع و حزام المرض و حزام الفقر و مليون حزام و حزام ملفوفين حواليهم من أظافر رجليهم لشعر راسهم، مش معني ان ربنا مدي انسان نعمة ما ادهاش لغيره انه ما يحسش بالناس و يتكلم اي كلام ملهوش وزن و لا قيمة و لا قابل للتطبيق علي أرض الواقع، و اللي عايز يبقي رئيس جمهورية لازم يبقي فاهم ان من واجبه ان شعبه يعيش حياة آدمية و يأخذ ابسط حقوقه اللي بيكفلها ليه الدستور و القانون الالهي قبل القانون الوضعي. اربط أنت الحزام يا أستاذ نور و طالب لولاد بلدك الغلابة بحد أدني يعيشهم زي البني آدمين لا أكتر و لا أقل أو علي الأقل سيبهم في حالهم عشان هم مش ناقصين اقتراحات سيادتك، لو مش قادر تبقي معاهم علي الأقل ما تبقاش ضدهم، استقيموا يرحمكم الله .