سلامي للجميع ومساء الخير على الجميع ... مشكلتي مش مشكلة أوي لاكن مضايقاني نسبيا .. انا بشهادة الجميع والمقربين زي القمر أو ( مزة ) على رأي أصحابي وإخواتي .. الحمد لله على نعمة الشكل والصحة .. بس الناس ابتدت تضايقني في الشارع وفي الجامعة ومع الجيران بالرغم من انهم بيشوفوني كل يوم تقريبا , نظرات الناس نفسها بتحرجني لدرجة اني بقيت امشي في الشارع بصة في الأرض على طول وحاسة اني مش واخدة حريتي نهائي وطبعا لو في واحدة مكاني يمكن الموضوع يبسطها لكن انا شايفة العكس ان الموضوع ده يوتر فعلا تخيلوا ان حد ماشي حاسس انه مراقب طول الوقت ومرصود حاجة سخيفة جدا لدرجة ان في ستات بيوقفوني يقولولي ماشاء الله انت جميلة جدا . من الآخر انا معنديش استعداد أوصل لدرجة اني مش عارفة امشي في الشارع وابدأ اختصر مشاويري حتى لو مهمة او اقصد انزل من العربية قدام المكان اللي رايحاه بالظبط لأن ده عمره ما هيظبط معايا .. يا استاذة نيفين .. لو انت مكاني هتعملي ايه ؟ فضفضة هههههههه انا لو مكانك هسوق عربية بزجاج غامق وهختصر مشاويري زي ما قلتي اكني عايشة حياة النجوم وهجيب سواق علشان ينزلني قدام المكان اللي انا رايحاة بالظبط لو فيه إمكانية لده , يا ستي انت زعلانة ليه ؟! صحيح الموضوع ممكن يكون فيه شئ من تقييد الحرية لكن تخيلي نفسك اتولدت قبيحة كان زمانك دلوقتي بعتالنا بتشتكي من مجموعة ضخمة من العقد النفسية ده لو مكنتيش عارفة تعيشي حالة تصالح مع نفسك ! ولا ايه ؟ كلام بجد بقى .. ربنا يحميكي وانصحك بالدعاء ده : اللهم إحسن خُلقي كما أحسنت خلقي .. واحمدي الله الذي فضلك عن بعض الناس واتمنى أيضا أن يُفضلك بالخُلق الحسن والدين الصالح ويمن عليك بالصحة وراحة البال .. خلي بالك طويل شوية وبراحة عل الناس شويتين وربنا هيسهل إن شاء الله .. وسيبك من التركيز مع الناس وركزي في حالك وشوفي ناقصك ايه عند ربنا وكمليه زي ما أنعم عليكي إفتكريه . نيفين حجازي
