قالت صفحة أنا آسف ياريس المؤيدة للرئيس الأسبق حسني مبارك، تحت عنون رداً على التصريح "المنسوب" للفريق السيسى بأنه لا عودة ل«الوجوه القديمة»، ومصر لن ترتد لما قبل «25 يناير» أنه فعلا لا عودة لنظام ما قبل 25 يناير علشان كان عندنا نسبة تنمية 8% و دلوقتى لا تتعدى 2% يبقى فعلا لا عودة لنظام ما قبل 25 يناير. وأضافت الصفحة خلال تدوينة لها : و علشان كان عندنا احتياطي نقدي 38 مليار دولار و دلوقتى احنا على البلاطة يبقى فعلا لا عودة لنظام ما قبل 25 يناير، وعلشان كان عندنا وديعة الكويت كانت 120 مليون دولار سنة 1990 و سلمها مبارك 9مليار دولار يبقى فعلا لا عودة لنظام ما قبل 25 يناير . وتابعت الصفحة تعليقًا علي التصريحات التي قيل أنها للفريق السيسي : علشان كان عندنا الكهرباء مستمرة لا تنقطع و دلوقتى بنعانى من نقص في الكهرباء و انقطاعها بستمر يبقى فعلا لا عودة لنظام ما قبل 25 يناير، و علشان كان عندنا امن و أمان و دلوقتى بنعانى من البلطجة و السرقة يبقى فعلا لا عودة لنظام ما قبل 25 يناير ، وعلشان كان عندنا سياحة مستمرة طوال فصول السنة و كانت بدخل حوالى 14مليار دولار و دلوقتى بنعانى من عدم وجود اجانب مما يعرض صناعة السياحة للخطر يبقى فعلا لا عودة لنظام ما قبل 25 يناير
وأردفت : علشان كان عندنا سياسية خارجية كل دول العالم تحترمنا دلوقتى اصغر دولة فى العالم بتنهش فى جسد مصر يبقى فعلا لا عودة لنظام ما قبل 25 يناير ،وعلشان كان عندنا كل سنة مشروعات يتم افتتاحها دلوقتى لم نرى اى شروع ينفذ على ارض الواقع و اى مشروع ينفذ اليوم او امس كان من تخطيط النظام السابق يبقى فعلا لا عودة لنظام ما قبل 25 يناير ، وعلشان كان عندنا سجون و معتقلات متواجد بها الإرهابيين و دلوقتى الارهابيين بيطالبوا بحقهم فى الحكم يبقى فعلا لا عودة لنظام ما قبل 25 يناير .
واستكملت : علشان كانت عندنا دولة تقدر ليها مكانتها فى وسط العرب والعالم وبقينا دلوقتى ملطشة لقطر وتركيا يبقى فعلا لا لعودة لنظام ما قبل 25 يناير،و علشان طوال ال30 سنة مسمعناش على عنف فى الجامعات ولا طلبة بتموت ولا جامعات بتتحرق يبقى فعلا لا عودة لنظام ما قبل 25 يناير، وعلشان طوال ال30 سنة مشفناش جنود جيشنا بيموتوا على الحدود كل يوم يبقى فعلاً لا لعودة لنظام ما قبل 25 يناير. واختتمت : كل دى فعلاً مميزات تخلينا نقتنع بأنه فعلاً لا عودة لنظام ما قبل 25 يناير، لأننا فعلاً هنعود لنظام ما قبل التاريخ.!
الجدير بالذكر أن مصدر حكومي، فضل عدم ذكر اسمه، قال أن الفريق أول عبدالفتاح السيسي، نائب رئيس الوزراء، وزير الدفاع والإنتاج الحربي، أكد في اجتماع مجلس الوزراء، الأربعاء الماضي، أنه يرفض تمامًا عودة "الوجوه القديمة" إلى الساحة السياسية، وأن مصر لن تعود إلى ما قبل "ثورة 25 يناير". وأضاف المصدر، في تصريحات صحفية، أن تصريحات "السيسي" جاءت بعد فتح نقاش داخل اجتماع مجلس الوزراء حول عدم مشاركة الشباب في الاستفتاء، والشعور بالقلق من المقاطعة الجماعية التى ظهرت من جيل الشباب.
وقال أحد الوزراء المحسوبين على الجناح الديمقراطي في الحكومة، خلال الاجتماع، إن السبب الأساسى وراء إحجام الشباب، هو ما تتعرض له ثورة يناير وشبابها من هجوم وقسوة في النقد، وسجن بعضهم ومحاولة تشويه جزء آخر منهم.
بينما قال وزير آخر إن "السبب هو إحساس الشباب بأن الوجوه القديمة في نظام مبارك بدأت في الظهور والتحرك من جديد، وهو ما دفع الفريق السيسي للتدخل في النقاش"، مؤكدًا أنه "لا عودة للوجوه القديمة، ومصر لن تعود إلى نظام ما قبل ثورة 25 يناير مرة أخرى، ومن يعتقدون أن مصر ستعود إلى الوراء مخطئون".
