السلام عليكم ورحمة الله من الآخر يا استاذة نيفين انا قرفت من عيشتي بسبب صاحبتي كل ما نتقابل تسمعني موشح كنت فين رايح فين مين المزة اللي كانت معاك .. آه نسيت اقوللك إحنا متفقين ع الجواز بس قدام شوية لما الظروف المنيلة تتحسن , المهم .. كل ما اشوفها تقطمني على البنات اللي اعرفهم ودول اصلا هيفضلوا اصحابي حتى لو اتجوزت انا لو كنت عايز واحدة فيهم كنت اتجوزتها ومش محتاج يعني ارهاب علشان اعترف الموضوع واضح وعلاقتي بالستات عموما كل واحدة عارفة هية دورها ايه في حياتي وبالإتفاق ولما فكرت أتجوز فكرت مع اللي قلبي راح لها وهية مزة بصراحة , فموضوع الغيرة والمراقبة ده مش عاجبني خالص وبتهيألي انه هيهدد العلاقة دي , الغريب انها في الأول كانت طبيعية جدا وعاملة فيها مش فارق معايا وفجأة إتحولت زي كل الستات ما بيتحولوا .. المتحولوووون ههههههه خايف في يوم اتورط والله وخصوصا اننا مش بنسمع خير ابدا عن الجواز المهبب ده .. هية أمي السبب .. طول اليوم نفسي اشوفك في بيتك نفسي اشوف عيالك قبل ما اموت وكلام الأهالي ده .. حاسس انها هتموت وانا اللي هلبس في حيطة هههههه بعدين علشان هية تشوف عيالي أشوف أنا المر ؟ شوفي يا استاذة انا فاض بية والله ومش فاهم الستات دول ياريت تفهميني والنبي عشان خلاص هطلع عن شعوري مع البونية أحمد فضفضة محررة الصفحة .. نيفين حجازي والله يا أحمد بك أنا اللي فاض بية , بعدين لما الجواز مهبب على حد قولك وانت لسة ماشبعتش من المهام النسائية بتاعتك فكرت في الجواز ليه ؟ طيب .. ولما هوة روطة ماتسيب بنات الناس في حالها لغاية ما تشبع انت من مغامراتك بعدها تفكر في جواز .. ايه رأيك ؟ أنا شايفة انك مش جد كفاية , ولما الستات متحولات بالمنظر ده بتحبهم كدة إزاي ولا انت عندك فصام في الشخصية ؟ ولا همة حلوين من غير مسئولية بس ؟ بص يا أحمد بك أنا مضطرة أستعين بقراء فضفضة الكرام في الرد عليك .. إعتبرني برة القصة دي أنا أعصابي بايظة أصلا .. إنت بتهزر يا أحمد والله .