الضبع جه وقال للأسد .. عايز تفوز فرق تسد قام الأسد داس ع البلد ضرب الحريم حبس الولد ربى الدقون زاد الجنون .. خلى الزبون خاف م الحسد فرق ما بين كل الفئات .. خزق عنين زود آهات عاش اللي عاش .. مات اللي مات بس الكلام .. مات للأبد لما أتعاهدنا واتفقنا وافترقنا .. لما اتفقنا وبعد يوم بس اتخانقنا لما افتكرنا إن اللي كان سادد طريقنا .. ريس وراح قال يعني لقمة تبل ريقنا والطعم كلناه وإحنا آخر انسجام .. قولنا إنه مات يبقى خلاص سقط النظام والشهدا ماتوا وهما يدولهم تمام .. ويقولوا ثورة جميلة يلا نروح ننام والنوم غلبنا وكل يوم واحد يقوم .. ياخد عصاية في راسه ويكمل في نوم اللي يدوخ واللي يموت وكل يوم .. الناس بتلعن فينا أو ممكن تلوم ويقولوا بس كفاية ثورتنا انتهت .. دلع الشباب خلاها زادت وافترت ويقولوا بورصتنا بتنقص واتهرت .. ويبيعوا دم الشهدا والناس اشترت اللي اشترى بقرشين حرام .. واللي ببضاية وجوز حمام واللي اشترى دماغه وقال .. باظت خلاص مات الكلام ورجعنا ننده تاني ونهاتي في سراب .. وناس تعيش بردانة وتموت بالعذاب وناس بتاكل بيدزا أو ريشه كباب .. ويقولوا ع الفقرا حثالة أو كلاب لكن برافو عليه بجد .. أسد لئيم عرف يهد ويبني بينا ألف سد .. واللي معانا يبقى ضد إحنا الكلاب .. إحنا اللي ثورنا في يوم عليك إحنا اللي مش هانكون عبيدك أو نكون لعبة في أديك إحنا اللي هانموت ضباعك اللي كل ولائها ليك إحنا اللي هاندوسك ونصحى ونتحد نغزق عنيك إحنا الكلاب وعشان كلاب .. فرقتنا والخلق داق لكن نسيت إن الكلاب فيها الوفاء وإحنا هانوفي للي ماتوا واللي عايشين في الوباء الكلب هايقوم من جديد الكلب فاق