حصل الفنان والمذيع خالد عليش اليوم على حكم قضائي يمكنه من رؤيه ابنته من طليقته لمدة 11 ساعة اسبوعيا، ويأتي الحكم بعد العديد من المنشورات التي تبادلها الطليقان عبر مواقع التواصل الاجتماعي.. وفي السطور التالية نرصد لكم القصة كاملة . خالد عليش وطليقته بداية الأزمة : قبل فترة نشرت طليقة الفنان خالد عليش عبر صفحتها منشورا قالت فيه: بعد الطلاق الرسمي اتفقنا على رؤية البنت وكان بيشوفها بانتظام وبشهادة كل الناس وبشهادة المدرسة، وفجأة في عيد ميلاد البنت عرفت إن فيه قضية مرفوعة من شهر 12، وماكنش معايا أي محامي لأني تنازلت عن كل القضايا مقابل قضية جنائية كان رفعها عليا». وأضافت، «الأمور وصلت أنه بيتكلم مع أمهات أصحاب ميما في المدرسة وبلاقي ناس قاعدة بتتكلم معايا وعلى بنتي في أدق التفاصيل، وأتمنى عدم الضغط عليا بسبب الصور في أي حاجة تخص ميما عشان بلاش أضطر أرد». وقامت طليقة خالد عليش بعد ذلك بنشر منشور اضافت فيه : للأسف أنا بقالي فترة بيتم استغلال اسمي واسم بنتي في حروب وتريندات مالناش دعوة بيها وكنت ماسكة نفسي عن عدم الرد مهما حصل.. وأنا هرد على نقطة إنه بيصدر للإعلام إن البنت ممنوعة منه وهو هيموت ويشوفها، ومش هتكلم عن أي حاجة تانية، وده عشان عمري ما هبدأ بالكلام عن أي حاجة غير لو اضطريت زي دلوقتي". خالد عليش وابتته وأضافت: "للأسف وبشهادة كل الناس اللي حواليا، الأب اللي عمال يتكلم عن محكمة الأسرة وحق الأب في رؤية بنته وكذا نقطة ومعايا الورق الرسمي لكل كلمة". وتابعت: "اتركوني أعيش في سلام وهدوء أنا وبنتي وأمي ومش عايزة أي حاجة لأن أنا لست بالذكاء الكافي للتحدث في السوشيال ميديا، ومبعرفش ألعب ألاعيبها خالص وممكن أكون بعك". أما المذيع خالد عليش فقد نشر صورة مع ابنته عبر حسابه الشخصي على موقع التواصل الاجتماعي لتبادل الصور و الفيديوهات انستجرام. وعلق خالد عليش علي الصورة قائلا :" ربنا عالم انا قد ايه محتاج حضنك في اوقات كتير...ربنا يهدي الأمور ويجمعنا علي خير ". فيما ردت بعدها طليقته قائلة : السادة الصحفيين الافاضل للمرة المليون ؛انا مش هقول اي تصريحات ولا هرد على اي تصريحات". طليقة خالد عليش ترد : تابعت :" الموضوع متروك للقضاء وانا على ثقة بقانون بلدي والقضاء المصري وترندات السوشيال ميديا لا تصح اخلاقيا على حساب ناس ملهاش ذنب". وأضافت :" انا معايا ما يثبت قانونا ان كل ما يقال افتراء وكذب ونفاق ؛ لكن لن ادخل في هذه المناقشات والترندات مرة اخرى ومن السهل جدا اثبات افتراء الطرف الآخر بس الى هذه اللحظة لن أفعل ذلك". وأكدت :" ومن لجأ للقضاء اولا واخيرا وإلى هذه اللحظة لست انا بعدما كان التعامل بصورة ودية ومن جعل سيرتنا مادة للصحافة لست انا وحل الخلاف لا يوجد له الا طريقان اما ودي او قانوني ولكن هناك طرف لا يرضيه اي حل منهما ولم اطالب الى الان بأي حق قانوني او معنوي او مادي ". واختتمت :"أتمنى اصحاب الشأن ان لم يتقوا الله في تصريحاتهم رجاء مني خاص للصحفيين الشرفاء عدم تداول الترندات لانه يؤثر سلبا على حياة بني ادمين ليس لهم ذنب في كل هذا ومن الجمهور العادي ان يعلموا ان الحقيقة ليست وراء بوست او كلام مكتوب وإني من السهل جدا ان اكسب الرأي العام في صفي ولكن كما ذكرت لن ادخل في هذه الحرب مرة اخرى .. انا اغلقت موبايلي والسوشيال ميديا من الصبح بسبب كمية التلفونات والسكرين شوت .
خالد عليش يتمكن من رؤية ابنته ولعل اليوم قد حكم للمذيع خالد عليش بحكم قضائي يمكنه من رؤية ابنته 11 ساعة اسبوعيا ، وقد علق عبر صفحته قائلا : النهاردة أنا خدت حكم تاريخي يارب يتنفذ على خير، وتاريخي لأنه أحسن حكم ممكن آخده في ظل ظروف قانون الأسرة السيئ لحين تعديله، واللي طلع الحكم قاضي مش واحد صاحبنا.. ف ده معناه إن الراجل قرأ وفهم وبيدي لكل واحد حقه". خالد عليش
وتابع: "لكن جه الوقت اللي أقول فيه اللي جوايا .. حسبي الله ونعم الوكيل، أنا خصيم لكل واحد أو واحدة حتى يوم الحساب ساعدوا بشكل مباشر أو غير مباشر إني ما اشوفش بنتي بطريقة إنسانية..كل حد كبير أو صغير جريت وراه بالمكالمات عشان أشوف أي حلول ودية". وأكمل: "حتى الحركات والجروبات النسوية اللي بيدافعوا عن الست وخلاص، أي حد بيكتب تعليق وهو مش فاهم حاجة، فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم". وأضاف: "أنا ملتزم بكافة الالتزامات المادية ناحيتها من أول يوم كاملة وزيادة كمان عن المستوي المادي والاجتماعي اللي عايشين فيه ومع ذلك استحملت كتير وماردتش، انا لا حول لي ولا قوة حاولت مع كل الحلول الرسمية و غير الرسمية، تعبت من اللف في دوائر مغلقة". وعقب: "تعبت من نظرة والدي و والدتي المريضة اللي نفسهم يشوفوا حفيدتهم و مش قادر اعملهم ده، انا اوحش رجل في العالم و لكن ما استحقش ان ما يكونش عندي فرصة اتكلم و اخرج معاها و افسحها عشان علاقتي بيها تبقي كويسة، محدش يقولي انت السبب عشان سيبت مامتها، انا ووالدتها كان في بينا عشرة طيبة و ايام كتير حلوة ولكن لم يحالفنا التوفيق في النهاية و كل شيء نصيب و الانفصال كان برغبتها قبل رغبتي". وأشار: "محدش يقولي ما انت كنت زوج وحش و .. و .. انا يمكن مكنتش احسن زوج برغم اني عملت اللي عليا كتير واجتهدت كتير عشان اسعد الطرف التاني ولكن ده مش معناه اني انسان وحش ومستحقش فرصة تانية ومستحقش اشوف بنتي، محدش يقولي ما انت مبسوط و اتجوزت تاني، انا فعلا الحمدلله زي الفل و مبسوط إني خدت فرصة تانية ربنا يكرمني فيها واكون انسان افضل واستمتعت بحق ربنا سبحانه و تعالي و المجتمع ادهوني اني اتجوز تاني بعد انفصالي رسميا بأكتر من سنة بس مش معنى كده اني أرمي طفلي مع امه و مطلوب مني انساه محدش يقولي ما انت كنت بتشوفها". الإعلامي خالد عليش يحصل على حكم برؤية طفلته 11 ساعة أسبوعيا أخبار الفن: ميما الشامي تهاجم طليقها خالد عليش.. ذكرى ميلاد يونس شلبي وتابع خالد عليش كاتبًا: "انا فعلا مع بداية الانفصال كنت بشوفها ساعات قليلة في الاسبوع بس مع أي تصرف ما يعجبش مامتها تقولي أصل البنت مش فاضية عندها عيد ميلاد عندها تمرين ووسط شروط كتير منها متتصورش معاها وتنزل ليها صور - متوديهاش عند اهلك - تيجي عيد الميلاد لوحدك بدون باباك أو مامتك، حسيت في الوقت ده اني لازم استخدم التعاقد اللي بيني وبينها اللي بيقول إني آخد البنت يوم في الأسبوع ولكن القانون اداني حق الرؤية الطبيعي غير الانساني لطفل". وأوضح: "فضلت 5 شهور في مساومات إني معملش تنفيذ لحكم الرؤية حفاظا علي البنت ولكن مامتها صممت وبعد التنفيذ كان مهانة ومذلة للطفلة و ليا بعدها مبقتش اروح و بعت انذار رسمي ليها بكده ومازلت في الإجراءات القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب". وكتب: "محدش يقولي ما انت ما بتصرفش عليها و مبهدل مامتها في المحاكم، برغم ان مش ده الموضوع بس الحمد لله الفلوس اللي الأم طلبتها كنفقة ومصاريف بتوصل كل أول شهر بدون اي محاكم من أول يوم حصل بينا انفصال رسمي بدون محكمة بعقد اتفاق بينا و لو حصل دخول محاكم في اول الخلاف ف الام اللي بدأته وده بالتواريخ مش بالكلام. موضوع ان فيه مصاريف زيادة بتطلب بشكل مبالغ فيه دي قصة تانية فيها نقاش وحوارات كتير و مع ذلك قولت انا عندي استعداد لأي زيادة غير منطقية بس نقعد ونتناقش". وأنهي كاتبًا: "محدش يقولي روح شوفها عند جدتها عشان انا مش هاعرف يبقي في علاقة طيبة بيني و بين بنتي و انا قاعد معاها ساعة عند جدتها و هما قاعدين جنبي وقعدتي تبقى كلها مذلة و مهانة. محدش يقولي انت بتتظاهر انك عايز تشوف بنتك لكن انت مش فارق معاك، الابهات هنا اللي هيحسوا قد ايه دي حاجة مؤلمة و انا مش محتاج اعمل ده و طول الوقت طلبت من اي حد قريب منهم ان احنا ننزل و نقعد و نوصل لحل وسط انا مش طالب فيه غير اني اخد بنتي يوم في الاسبوع اخرجها و ارجعها. أنا نفسي أحس بحضن بنتي بقالي أكتر من سنة ومقعدش أتكلم في مشاكل حصلت من سنين أنا أوحش رجل في العالم بس حقي آخد فرصة عشان تكون في علاقة كويسة بيني وبين بنتي ".
