أحمد صالح يكتب: عار علينا

عار علينا لما بلدنا تغتصب وإحنا لا حول لنا ولا قوة.. عار علينا لما أتقتل بسلاح أنا اللى دافع تمنه واللى قتلنى من بلدى ودمه من دمى.. عار علينا لما الرجولة تنعدم والرحمة تندفن جوه نفوس ظالمة وخاينة لبلدها وشعبها.. عار علينا لما أشوف بنت بلدى بتتهان وتنضرب.. ويقولولى إنتى إيش عرفك وفهمك؟؟!!
عار علينا لما الشهيد يموت ويتقال عليه دا كان بلطجى ومخرب ويستاهل كده.. عار علينا لما التاريخ يصبح رماد و ورق على الرصيف بيترمى.. عار علينا لما اللى سرق وخان ونهب يبقى بيتفرج على دمنا على الأرض.. وبناتنا بتتضرب!! عار علينا لما نرمى التهمة على طرف خفى.
هى معادلة من طرفين قاتل ومقتول.. غاصب وأرض وشعب بيغتصب.. وإذا كان فيه طرف تالت بقالنا سنتين بنلف حوالين نفسنا عشان نشوفه!!!!!!!!!!!!!
الجيش والأمن الوطنى والمخابرات العامة والداخلية وغيرهم كتيير.. كل دول مش قادرين يعرفوا الحقيقة فين؟ ولا عارفين ومطنشين ويمكن يكونوا بيردوا الجميل؟؟ وبينفذوا أوامر ناس غايبين وسايبينهم ياخدوا حقهم ياخدوا بتارهم ويندمونا على صوتنا اللى اترفع يوم ما قولنا "عيش.. حرية.. عدالة اجتماعية"!!
الحسبة بالعقل والمنطق ومش محتاجة كلام كتير.. مصر مالهاش غير شعبها ولازم يسترد كرمته وحقه، وكفاية قوووووووووووى الكلمتين اللى حاطينهم على عينينا وماشيين عشان ما نشوفش جرايمهم، "الجيش هو اللى حمى الثورة والإخوان اليهود كانوا في الصفوف الأولى"!!!!!!!! شيلوهم بقى عشان تشوفوا الحقيقة كويس، على الأقل عشان تكون محايد بلاش تقف فى الصف وتتفرج على اللى بيحصل، اقف من بعيد واتفرج هاتعرف مين فينا اللى ظلم وباع وقبض تمن دماء وأرواح شهدائنا.