انا كنت جاى فى مسيرة 6 ابريل اللى رفعت اعلام الشهيد ابو الحسن .. واول ما 6 ابريل وصل بدأت الاشتباكات والحجاره كان بتترمى الاول من داخل المدينه الجماعيه على الشرطه العسكريه .. وطبعا الشرطه العسكريه كانت بترد علينا برده بالحجاره ورش الميه .. لحد ما الامور اتطورت وابتدى الجيش يضرب غاز ورصاص حى .. الجيش فجاه اقتحم مكان الاعتصام عشان يمشينا كلنا . كان معايا محمد حسن وهيما .. واحنا بنجرى قنبله مسيله اترمت علينا خلتنا نجرى جوا الشوارع اللى فى العباسيه .. هيما اختفى وفضلتا انا ومحمد حسن .. فى الشوارع لقينا بلطجيه بيضربوا فى ناس ومغرقينهم دم .. مكانش قدامنا غير حلين يا اما نخش نتضرب زيهم يا اما نمشى فى الغاز طبعا اختارنا اننا نمشى فى الغاز .. طلعنا دايخين . وهنا اتفرقنا محمد مشى فى ناحيه وانا فى ناحيه .. ومن سؤ حظى دخلت انا العباسيه نفسها ... طبعا عملت نفسى مش مع الثوار وعملت مش عارف اى حاجه .. وكنت مضطر انى لما اشوف اى حد بيتضرب اقف واتفرج عليه عشان محدش يحس انى عايز اهرب من حاجه ... فضلت ماشى فى العباسيه ناحية مسجد النور .. لقيت الجيش عامل كاردون على المسجد .. واللى بيخرج منه البلطجيه بيعذبوه . والجيش عليه يستلمهم غرقانين فى دمهم .. مشيت على طول عايز اروح ناحية مترو عبده باشا .. لقيت شاب سلفى واكتر من 20 واحد نازلين فوقه بالسكاكين من غير رحمه وفى الاخر بيقولوا سلموه للجيش . بصيت قدامى لقيت اللجنه الشعبيه . مش هعرف اعدى ... عملت نفسى مع الناس اللى ماسكه الشاب السلفى ... قابلهم ظابط جيش عشان يستلمه .. وقالهم ايوه كده يا رجاله طلعوا دين امهم كلهم وقفت تليفونى بيرن .. مرعوب وخايف ارد من الدم اللى انا شايفه .. رجعت تانى ناحية مسجد النور ... قلت يمكن الاقى مخرج .. لقيت اشكال غريبه وواقفه مع الجيش وبيقولوا الجيش والشعب ايد واحده وماسكين اسلحه فى ايديهم .. وقفت معاهم عشان محدش يشك فيا ... ببص حواليا لقيت كل شارع جانبى بيخرج من مجموعه مسلحه بيبقوا ماسكين واحد او اتنين ونازلين ضرب فيه بغباء .. بدون رحمه .. منهم واحد اتسلم رغم انه دماغه مفتوحه العسكرى كمل عليه اكتر حاجه كسرتنى مش انى مكنتش عارف اخرج من العباسيه ولا انى كنت هموت .. اكتر حاجه كسرتنى لما شفت البلطجيه ماسكين شيخ كبير ومتغرق دم .. وبيسلموه للجيش والعساكر بيكملوا عليه .. حسيت انى جبان لما لقيت الظابط بيبصلى .. قلتله " الله ينور يا باشا موتوهم " ... كان لازم اعمل كده .. !!! قابلت واحد من اللى واقفين من المنطقه بتاع العباسيه . جاى عليا راح واقف جنبى .حسيت انه شك فيا .. رحت انا مكلمه بنفسى عشان وقلتله هو فى ايه يا نجم .. قاللى انت مش عايش فى البلد ولا ايه .. السلفيين بيدخلوا علينا برشاشات ويموتونا .. قلتله عشان كده كل شويه الاقى شيخ بيتضرب .. قاللى د احنا هنموتهم .. قلتله ربنا معاكم .. مكانش قدامى حل تانى غير انى ارجع ناحية قسم العباسيه . وهناك اللجان الشعبيه مكثفه وكلها مسلحه .. قلت انا كده كده ميت .. وهعدى وزى ما تيجى .. .. كنت كل ما اقابل مجموعه امشى معاها . واعمل نفسى معاهم .. فضلت ماشى عايز اروح مترو عبده باشا .. كل متر الاقى واحد غرقان فى دمه وبيخلصو عليه .. اغلب اللى بيتضربوا مربيين لحيتهم .. قربت من قسم العباسيه .. لقيت كشك على اليمين . حسيت بالخطر لان دى اكتر حته فيها . خطر وقفت عند الكشك واشترين كانز .. وقعدت ع الكرسى عشان اللى يشوفنى يفتكر انى مع البياع .. فضلت مراقب قسم العباسيه .. كل شويه ناس تيجى غرقانه فى دمها ويسلموها فى القسم .. والعساكر اللى فى القسم شايفه الناس اللى بيتضرب بالسلاح وكانه شئ عادى ... فجاه لقيت مجموعه خارجه من الشارع اللى جنب القسم من الثوار حوالى 12 واحد وبيجروا . والبلطجيه بيجروا وراهم بالاسلحه .. واتمسكوا كلهم عند القسم . وكله غرق فى دمه .. استغليت انا الفوضى اللى حاصله قدام القسم وعديت بهدؤ ... فضلت ماشى لحد ما وصلت مترو عبده باشا .. ركبت المترو .. وسايب اكتر من 1000 واحد فى الشوارع . مش عارفين يخرجوا .. اقسم بالله انا ما غيرت كلمه من اللى حصل من اول ما اليوم بدأ
