أعلنت عدد من الصفحات السكندرية على موقع التواصل الإجتماعى فيسبوك، عددا من الطلبات للمصطافين المتوقع حضورهم إلى المحافظة الساحلية قبل بداية فصل الصيف. وجاءت الطلبات التى تم نشرها كالتالى : من اهالى الاسكندريه الى المصيفين: 1- فى فرق بين الشورت والمايوه وال ملابس الداخلية وانت فى الميه ممكن تلبس شورت او مايوه بس اوعى تنزل ب بالملابس الداخلية. 2- ممكن تاكل اى حاجة انت عايزها على البحر محشي , مكرونه بشاميل , سمك أى حاجة , بس يا ريت تنضف وراك و متقولش بتوع الشط بينضفوا لا نضف انت الاول. 3- يا ريت وانت فى المية ماتشيلش صاحبك ترميه , و لا ترش عليه مية وتزهق اللى فى الشط كله , اه احنا فى بحر بس برضه مينفعش ترش على الناس مياه و تطرطش على مخاليق ربنا. 4- ماتجريش ورا صاحبك بين الشمسيات وتحدفوا بعض بالرملة. 5- وانت بتعدى الشارع يا ريت يعنى تشوف اقرب نفق او حتى اشارة تعدى منها عشان ماتوقفش الطريق. 6- احنا فى اسكندرية بطلنا نعاكس لو لقيت بنت ماشيه فى حالها ماتعاكسهاش. 7- لو ابنك او بنتك عنده سنتين و عايز تنزله الميا , لبسوا حاجة , ماينفعش ينزل ملط. عيب كده , لو انت مسلم ده مايرضيش ربنا , و لو انت مسيحي فده مايرضيش الرب. 8- خلى بالك عشان هتلاقى ناس كتير بتليفونات بتصور , هما مش بيصورا بعض , هما بيصوروك انت لو عملت حاجة من اللى فوق دول , و انت ماترضاش صورك تنزل على النت. 9 - اقرا اللى فات كمان مرة. 10- تنورنا ياعم وعلي راسنا من فوق.
