ناشد الدكتور "هاني الناظر"، أستاذ أمراض الجلدية ورئيس المركز القومي للبحوث السابق، الأباء والأمهات بالذهاب على الفور للطبيب بمجرد ظهور "الثعلبة" وهى مرض جلدى غير معدى يسبب مساحة مستديرة خالية من الشعر فى رأس الأطفال بمجرد دخولهم العام الدراسى الجديد نتيجة للخوف والتوتر، مؤكدا أن العلاج يكمن فى الكورتيزون والفيتامينات. وكتب "الناظر" فى تدوينه له عبر صفحته الشخصية بموقع التواصل الإجتماعى "فيس بوك" : "الثعلبة ".... ايه معناها وايه حكايتها ؟ هي مرض جلدي غير معدي ولكنه بيمثل مشكلة بتقلق دايما الأمهات لما حد من الأبناء يصاب به والمرض بشوفه كثير في العيادة مع بداية العام الدراسي وبيظهر علي هيئة مساحة تكاد تكون مستديرة في فروة الرأس وخالية تماماً من الشعر وبتكتشفها الام فجأة وبدون مقدمات ولا يصاحبها اي أعراض يعني مفيش التهاب او الم او حرقان او غيره". وتابع : "العلماء فسروا سبب المرض بأكثر من نظرية لكن التفسير الاكثر واقعية هو ان المرض بيجي مع التوتر العصبي .. وغالبا ده بيحصل عند البنات والأولاد مع بداية العام الدراسي نتيجة العودة من اجازة طويلة والإرهاق في المذاكرة والواجبات المدرسية وغيرها واحيانا يتعرض الطفل لمضايقات من بعض زملائه او التعرض لمواقف تسبب له توتر او نتيجة خوفه من مدرسة او مدرس معين .. وهكذا نجد ان السبب يكون نفسيا في الاساس". واضاف : "ويلاحظ دائماً ان الأمهات بتخاف جداً من المرض بسبب خوفها علي انتشاره وانه ممكن يشمل الرأس كلها علشان كدة انا عاوز اطمان الأمهات وأقول لهم لا متخافوش من النوع ده اللي بيجي للأطفال لانه عادة بيكون مرتبط بالسبب النفسي اللي ادي لظهوره وبمجرد اختفاء السبب بنلاقي المرض ممكن يخف لوحده والشعر يطلع تاني من غير علاج .. لكن ده موش معناه اننا لو اكتشفنا المرض نسكت ! لا طبعا ضروري نروح للدكتور فورا علشان نعرف السبب ونحله ونستبعد اي أسبابا اخري وكمان ناخد العلاج واللي عادة بيكون فيتامينات وتركيبات طبيعية بعيدة عن الكورتيزون". واختتم "الناظر" تدوينته قائلا : "وشفاء المرض ورجوع الشعر بيكون خلال شهر واحد باذن الله .. وطبعا هناك انواع اخري من الثعلبة بتيجي للكبار ودي لها اسباب تانية ولكن النهاردة انا إتكلمت فقط علي النوع اللي بيجي للأطفال الصغار خاصة مع بداية الدراسة".
