الدنيا علمتني وخدتنى ورجعتنى وفى الآخر سابتنى وقالت لى خلاص بقى ******************** ضحكت لى.. اتبسمت لى ورجعت كشرت لى بعد أيام الهنا وسقتنى كاس الشقى ****************** يا زمانى ارحم شوية بلاش تقسى عليا ما كفاية كده عليا خليك طيب بقى **************** لو ناوى تزيد فى جرحك ابعت لى مرة فرحك يمكن فى يوم أسامحك ويجيى يوم اللقا **************** علمنى أفرح فى يوم وأدوب الهموم وأعلى لحد النجوم يمكن انول الرضا ************* الدنيا علمتنى ما أكونشى فى يوم أنانى واكتم لحظة جنانى وأقول شعر وأغانى للناس المغرمة ************************* يا سنين الغُلب عدى سيبنى واستعدى يمكن أمسك بيدى نجوم ليل السما ************* الدنيا علمتنى ما أبصش يوم لغيرى والكل ياكل فى خيرى ولا ابيعشى يوم ضميرى للناس المجرمة ***************** يا سنين عمرى اللى فات ها أعيش ع الذكريات وارسم ألمى حكايات للذكرى المؤلمة *********** خليك يا زمانى فاكر يا اللى ضميرك مسافر عمرى للخير ما ناكر فى الهجر واللقا ****************** دمعى يا دنيا كفى وجرحك ليا وفى والحزن زاد وكفى يا سنين متسرسبة ************** الدنيا علمتنى ما أمنشى لحد خاين والغدر فى طابعه باين واللى للعشرة هاين وبيرضى لى الأذى ************** أبات كتير مجروح وارقص كما المدبوح وهم ميعرفوش.. إن اللى باقى منى يدوب حلاوة روح.. تكفينى سنة *************************** ها اتعلم الآسية وانسى اللى فات شوية يمكن عمرى اللى آتى يكون أيام هَنا **************** يا زمانى ليه معاندى وعن فرحى مباعدنى وهو كان واعدنى يعدى من هِنا **************** الدنيا علمتنى إنى أخد قرارى وما اسيبشى مرة تارى وأدوب شهد عمرى أحلى بيه مرارى وأدندن بالغُنا ************** انا بلبل غريب في الدوح بيرقص رقصة المجروح ها أشيل السر جوايا ومش ممكن لحد أبوح.. عشان ما أنامشى يوم مجروح.. وأصهلل صهللة **************** الدنيا علمتنى ما أجيش على نفسى تانى وأعيش بقى شخص تانى اكتب شعر وأغانى وأعاند الحياة يمكن تلين بقى ************** حاسبى يا دموعى حبة صاحبينى حبة حبة وكله بالمحبة.. الحزن يستخبى ويبطل جلجلة ******************* غدرك يا صاحبى خلى الجرح يزيد.. وناره تقيد والسكر اللى عندى لمرارك يوم ماحلى ********************** صابر يا زمانى صابر ولسه ها أعيش وأغامر ولا يمكن يقوم ها أقامر بعشرة عمرنا ********************** فرحى يا دنيا علم على جراحك وسلم وأدى الخاين مبلم من صبرى عليكى أنا **************** اسقينى النور كاسات وشيلى لى الذكريات وحياة جرحى اللى فات ما انا ماشى من هِنا