البدلة في التصاوير شبه المقام بالظبط الحلم ساكن ميدان والحكم مش بالربط دخل العساكر في العيون بالعشم خرج العساكر م القلوب بالخبط. *** دا دم مين يا اما دا دم من عيني دهسوا العيال يا اما والدم في عيني دم الشهيد انكسر والكسرة في عيني حالف ليصبح أمل ولو تروح عيني ** البدلة في التصاوير يبقى القضاء عسكر والناس على فهمهم للحلم يتفسر يقولوا يمكن غلط لما الخراب عسكر يقولوا يمكن نسي إن الصليب أزهر يمكن يكون اتوهم يمكن يكون اتعمى يمكن يكون أغبر يا اهل البيادة أفهموا: البدلة في التصاوير لازم هاتتكسر *** خايف على بدلتك؟ طب سلم الدفة تبقى العروسة بلد بالثورة تتدفى يبقى العريس سيدك اسمه رئيس مدني يحكم بلا رتبتك أصله رئيس مدني يطفي شموع خوفنا نبقى بلد مدني وتعيش على حدودنا عسكر ومش مدني احفظ مقام بدلتك أصل الطوفان فالت والحلم زي الميدان مالوش مزاج ظابط يا شيخ دي أرض اللوا مافيهاش ولا ظابط ارحم مقام بدلتك لنجيبلك الظابط