عرض الكاتب الصحفي عبد الرحيم علي تسريبًا جديدًا بين القيادي السلفي حازم صلاح أبو إسماعيل وعصام العريان القيادي بجماعة الإخوان المحظورة خلال برنامجه الصندوق الأسود، وجاء فيه.. حازم صلاح أبو إسماعيل: السلام عليكم. عصام العريان: وعليكم السلام ورحمة الله وبركاته. حازم صلاح أبو إسماعيل: أعتذر على إزعاج سيادتكم.. أنا حازم صلاح أبو إسماعيل. عصام العريان: لا يا أفندم انت تنور أيوه طبعًا يا أخى الكريم معروف. حازم صلاح أبو إسماعيل: الله يبارك فيك.. أنا عارف إنى بازعجك.. ربنا يحفظك يا رب العالمين.. إن شاء الله تكون بخير والأسرة الكريمة والجميع. عصام العريان: الحمد لله رب العالمين. حازم صلاح أبو إسماعيل: بص أنا حبيت بس أقول لحضرتك شوف حضرتك كل اللى أنا سبته مكتوب فى ورقة يعنى شوف إنه بِيجد حثيثًا يا أستاذ عصام.. شايف حضرتك ميدان التحرير 3-4 ساعات بيضربوا فى بعض وهناك "الكوربة" الأسبوع اللى فات وادى التحرير وميدان جامع محمود وموضوع أحمد شفيق وموضوع النصارى وبدأت نقطة بعترة الناس، يعنى الوضع مش هيفضل أيام ولا أسابيع بالصورة المحتشدة أو إن الناس تمزق على قدم وساق أنا أخشى……. عصام العريان: مش مختلفين على كده إطلاقًا إن فيه ثورة مضادة وفيه ناس هتقعد تعمل كده، وهتعمل كل هذا، لا نختلف فى ذلك، معاك القصة إن إنت بتتكلم فى اتجاه تانى خالص ما هو ده شغل الحزب الوطنى وشغل البابا للأسف شغل إخوتنا السلفيين اللى هما بيساعدوا على هذا وشغل أمن الدولة فلازم نواجهه. حازم صلاح أبو إسماعيل: حتى الحزب الوطنى اللى كانت أعصابه سابت وتلاشى لا يمكن يجييبوا محمد رجب يقول هنعمل انتخابات رئاسة جديدة ويقعد مع المجلس العسكرى إلا لو كان واخد مؤشر من السلطة بسند من البعترة إلى إعادة اللملمة للحزب مرة أخرى. عصام العريان: أيوه يا دكتور لا يوجد أدنى شك فيما تقوله، القصة كلها كيف نواجه ذلك لا أكثر ولا أقل، إحنا عارفين إن فيه ناس معترضة وفيه ثورة مضادة، وهيعملوا أكتر من كده، ويبذلوا ما فى وسعهم من أجل إنجاح مخططهم وإفشال الإنجازات اللى حصلت. حازم صلاح أبو إسماعيل: أنا باقول لحضرتك لكسب الوقت؛ لأن الوقت متراخي. عصام العريان: إن شاء الله ربنا هيكرمنا وعايزك تثق فى الله عز وجل ونحن نجتهد والتوفيق من عند ربنا، وانت موجود مع الناس والدكتور صفوت حجازى فى القرية اللى فيها الكنيسة اللى حصل فيها المشكلة. حازم صلاح أبو إسماعيل: إحنا موجودين فى الشارع، بس أنا باكلِّم حضرتك علشان الوقت مش فى صالحنا؛ لأن هو بيقول لك سيبهم أسبوعين طيب واستنى لحد ما البلد تخرب.. ربنا يستر على كل حال ما دام الحمد لله أنا أوضحت.. أنا والله أقسم لك برب العزة لولا خوف الإثم ما كنتش أزعج أحد، بس آهو على كل حال. عصام العريان: ربنا يبارك فيك يا افندم. حازم صلاح أبو إسماعيل: السلام عليكم ورحمة الله وبركاته. عصام العريان: وعليكم السلام ورحمة الله وبركاته.