نظمت طالبات مدرسة السيدة زينب الثانوية بنات بالمحلة الكبرى وقفة احتجاجية أمس الأربعاء؛ للمطالبة بإقالة مديرة المدرسة التى حولت طالبتين إلى الشؤن القانونية بسبب انتقاد سياسات النظام والرئيس محمد مرسى فى الإذاعة المدرسية واقتباس جزء من مقالة للدكتور علاء الأسوانى يوضح فيها مدى ضعف الرئيس وفشل حكومته. "البديل" ينشر قصيدة الطالبة سالى سيد هاشم (حس بينا) التى انتقدت فيها الرئيس مرسى: حس حس يا سيادة الريس بينا حس بالنار اللى والعة فينا حس بشهيد حلمه ضاع حس بقهرة أهالينا ليك رب هتقابله.. طب هتقول له إيه؟ لما يسأل جنابك علينا حس حس بشوارع ماليها دم حس بقهرة أب وأم حس ببيوت جُواها هم والقلوب ماليها الغم حس ببلد بتموت وعز شبابها بيتسم حس حس بجدع عياله جاعت نزل يوكلهم فكرامته اتباعت اتسحل واتعرى فى وسط حكومتك وبعد ده كله حقوقه ضاعت حس ده أنا المصرى ابن البلد حلمى فى وسط الميدان اتولد حلمى فى بلدى تعلى لفوق وحلمى قدامى اتعرى واتجلد حس لما اتسحل واستغليت إنه راجل جعان وعاوز تكممه وتكتف عزته وتهز بلدنا.. بلد الشجعان لا مش هسكتلك ولا اسيبك تنهش فى لحم بلدى زى زمان حس ما أصلى خلاص م الموت ما عدتش باخاف عارف الموت؟ عارف معناه؟ الموت أحلام بتموت وتضيع الموت مش بس موت الحياة الموت صديق عمر يروح وصاحبه يتوه مجراه الموت مش بس روح بتطلع الموت ابن يموت وأمه ما تقدر تنساه الموت أب انكسر ظهره ابنه كان ظهره وقواه الموت يعنى مستقبل بيموت ويضيع وتموت أحلامك وياه حس حق اللى اتعرى يا ريس فين؟ ولا هو اللى عراه أصلاً مين؟ اللى عراه ظلم وكدب اللى عراه حكم مهين اللى عراه ديابة ما لهاش إحساس اللى عراه كلاب مسعورين اللى عراه سكوت.. اللى عراه جبروت اللى عراه سلطة بتكسر عين حس ورسالتى أخيرة لنظام جبان نظام فاسد ما لوش عنوان لو هاموت لو دمى منك يلاقى الجحود وتهددنى بسجن ظلام ولا لوجوده أى وجود ... مش هتسكت فيا الصوت.. ... مش هتسكت فيا الصوت..
